يراننىڭ سوڭعى شاحى موحاممەد رەزا پەحلەۆيدىڭ ۇلكەن ۇلى رەزا پەحلەۆي ەلدەگى جاپپاي نارازىلىقتار اياسىندا يرانعا ورالۋعا دايىن ەكەنىن ايتىپ، اقش باسشىلىعىن «شەشۋشى ساتتە» ناقتى ارەكەتكە كوشۋگە شاقىردى. ول بۇل تۋرالى جەكسەنبى، 11 قاڭتار كۇنى Fox News تەلەارناسىندا كورسەتىلگەن Sunday Morning Futures باعدارلاماسىندا مالىمدەدى، دەپ حابارلايدى "ادىرنا".
ء«سىز ءوزىڭىزدى بەيبىتشىلىك پەن زۇلىم كۇشتەرگە قارسى كۇرەستى ۇستانعان تۇلعا رەتىندە تاريحتا قالدىردىڭىز.. يراندا ادامداردىڭ ءسىزدىڭ قۇرمەتىڭىزگە كوشەلەردىڭ اتاۋىن وزگەرتىپ جاتقانى بەكەر ەمەس. يراندىقتار ءسىزدىڭ باراك وباما مەن دجو بايدەنگە مۇلدە ۇقسامايتىنىڭىزدى بىلەدى. ولار ءسىزدىڭ بۇرىنعىداي وزدەرىن ەلەۋسىز قالدىرمايتىنىڭىزعا سەنەدى»، – دەدى شاحتىڭ ۇلى اق ءۇي باسشىسىنا ۇندەۋ جاساپ.
دونالد ترامپ 10 قاڭتار كۇنى Truth Social الەۋمەتتىك جەلىسىندەگى جازباسىندا يرانداعى نارازىلىق بىلدىرۋشىلەردى تاعى دا قولدايتىنىن ءبىلدىردى. ال 9 قاڭتارداعى ءباسپاسوز كونفەرەنتسياسىندا اقش پرەزيدەنتى ەگەر يران رەجيمى جاپپاي زورلىق-زومبىلىققا بارسا، اقش قاتاڭ جاۋاپ قايتاراتىنىن قايتالادى.
ء«بىز ولاردىڭ ەڭ اۋىر، ەڭ ءالسىز جەرىنە وتە قاتتى سوققى بەرەمىز. بۇل اسكەر ەنگىزۋ دەگەندى بىلدىرمەيدى، بىراق وتە، وتە كۇشتى سوققى بولادى»، – دەدى ترامپ.
رەزا پەحلەۆيدىڭ ايتۋىنشا، ترامپتىڭ اشىق قولداۋى نارازىلىق بىلدىرۋشىلەرگە رۋح بەرگەن. ول قازىرگى جاعدايدى ۇلتتى «ازات ەتۋ» ءۇشىن شەشۋشى كەزەڭ دەپ اتادى.
«يراندى ازات ەتۋ ارقىلى بۇل مۇرانى ءبىرجولا بەكىتەمىز دەپ ۇمىتتەنەمىن. سوندا ءبىز دە، ءسىز دە يراندى قايتادان ۇلى مەملەكەتكە اينالدىرا الامىز. كەلىڭىزدەر، وسى جولدا بىرىگىپ، ەلىمىز بەن حالقىمىز ءۇشىن جارقىن بولاشاق قۇرايىق...
بۇل – بىزگە بەرىلگەن مۇمكىندىك. مەن العاشقى مۇمكىندىك تۋعان ساتتە-اق يرانعا ورالۋعا دايىنمىن. قازىردىڭ وزىندە وسى قادامدى جانە وتپەلى كوماندانى جوسپارلاپ وتىرمىن. بۇل جولى يران حالقى جەڭىسكە جەتەدى دەپ ۇمىتتەنەمىز. ولار جەڭەدى دە، ويتكەنى يراندىقتار بۇل ءىس ءۇشىن جانىن بەرۋگە دايىن، مەن دە سولاردىڭ قاتارىندامىن»، – دەپ اتاپ ءوتتى شاحتىڭ ۇلكەن ۇلى.
The Wall Street Journal گازەتىنىڭ حابارلاۋىنشا، 13 قاڭتار كۇنى دونالد ترامپ يرانداعى نارازىلىقتار اياسىندا اقش ءۇشىن قولجەتىمدى ارەكەت نۇسقالارى تۋرالى بايانداما الادى. كەزدەسۋدە ىقتيمال اسكەري سوققىلار، كيبەرقارۋ قولدانۋ، قوسىمشا سانكتسيالار ەنگىزۋ جانە وپپوزيتسيانى قولداۋ ماسەلەلەرى تالقىلانۋى مۇمكىن. Reuters اگەنتتىگى بۇل كەزدەسۋگە ترامپتىڭ جوعارى لاۋازىمدى كەڭەسشىلەرى قاتىساتىنىن اتاپ ءوتتى.
ايتا كەتەيىك، اكەسى موحاممەد رەزا پەحلەۆي تاقتان قۇلاتىلعاننان كەيىن 64 جاستاعى رەزا پەحلەۆي اقش-تا تۇرادى جانە تەگەرانداعى رەجيمنىڭ اۋىسۋىن قولداپ كەلەدى.
ەسكە سالايىق، اقش-تا ورنالاسقان HRANA قۇقىق قورعاۋ ۇيىمىنىڭ دەرەگىنشە، يرانداعى تارتىپسىزدىكتەر بارىسىندا 500-دەن استام ادام قازا تاۋىپ، 10 600-دەن استام ادام ۇستالعان.
يرانداعى شەرۋلەر 2025 جىلعى 28 جەلتوقساندا باستالدى. سول كۇنى تەگەرانداعى دۇكەن يەلەرى ەكونوميكالىق جاعدايدىڭ ناشارلاۋىنا قارسى نارازىلىق رەتىندە ساۋدا ورىندارىن جاپتى. كەيىن اكتسيالارعا باسقا دا ءىرى قالالاردىڭ تۇرعىندارى قوسىلدى.
30 جەلتوقسان، سەيسەنبى كۇنى، نارازىلىق بىلدىرۋشىلەر مەن پوليتسيا اراسىنداعى العاشقى قاقتىعىستار تىركەلىپ، كۇش قۇرىلىمدارىنىڭ كوزدەن جاس اعىزاتىن گاز قولدانعانى حابارلاندى. كوپ ۇزاماي اكتسيالار ساياسي سيپات الىپ، كەيبىر قاتىسۋشىلار يراننىڭ رۋحاني كوشباسشىسى ءالي حامەنەيگە قاتىستى بولۋى مۇمكىن «ديكتاتورعا ءولىم!» دەگەن ۇراندار ايتا باستادى. نارازىلىققا شىققاندار ساياسي رەجيمنىڭ اۋىسۋىن جانە بيلىككە پەحلەۆيدىڭ كەلۋىن تالاپ ەتۋدە.
يران ەكونوميكاسى 40 پايىزدىق ينفلياتسيادان جانە باتىس ەلدەرىنىڭ سانكتسيالارىنان قاتتى زارداپ شەگىپ وتىر.
2 قاڭتار كۇنى اقش پرەزيدەنتى Truth Social جەلىسىندە ەگەر كۇش قۇرىلىمدارى اۋىر ەكونوميكالىق جاعداي مەن جوعارى ينفلياتسياعا قارسى شىققان بەيبىت شەرۋشىلەرگە وق اتسا، اقش ارالاساتىنىن ەسكەرتكەن.
كەيىنىرەك بەيبىت شەرۋلەر تارتىپسىزدىكتەرگە ۇلاستى. تەگەران مەرى اليرەزا زاكاني 9 قاڭتارعا قاراعان ءتۇنى وتكەن اكتسيالار كەزىندە 50-دەن استام بانك پەن بىرنەشە مەملەكەتتىك مەكەمە ورتەلىپ، 30-دان استام مەشىت وتقا ورانعانىن مالىمدەدى.
