بەلگىلى ستەنداپ-كوميك الەكساندر مەركۋل 10 تاۋلىككە قامالدى. بۇل تۋرالى بۇگىن استانا قالاسىنىڭ اكىمشىلىك قۇقىق بۇزۋشىلىق ىستەرى جونىندەگى مامانداندىرىلعان اۋدانارالىق سوتىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، ازىلكەشكە قوعامدىق ورىندا زالدا وتىرعان قوناقتارعا ادەپسىز سوزدەر ايتتى دەگەن ايىپ تاعىلعان. سوت مالىمەتىنشە، الەكساندر مەركۋل "Instagram" الەۋمەتتىك جەلىسىندە جانە "YouTube" ارناسىندا قوعامدىق ورىندا سويلەگەن ءسوزىنىڭ بەينەجازباسىن جاريالاپ، سول ارقىلى اينالاسىنداعىلارعا قۇرمەتسىزدىك تانىتقان.
"سوت وتىرىسىندا ا.ي.مەركۋل ءوز كىناسىن تولىق مويىنداپ، جاساعان ارەكەتىنە وكىنىش ءبىلدىردى. 2024 جىلى 7 ماۋسىمداعى بەيادەپ سوزدەر ايتىلعان ۆيدەو مەيرامحانادا وتكەن ءازىل-وسپاق اياسىندا تۇسىرىلگەنىن ءتۇسىندىردى”، – دەدى سوت.
جاسالعان قۇقىق بۇزۋشىلىقتىڭ ءمان-جايى قۇقىق بۇزۋشىنىڭ ايعاقتارىمەن، بەينەجازبامەن، اكىمشىلىك قۇقىق بۇزۋشىلىق تۋرالى حاتتامامەن جانە ءىستىڭ باسقا دا ماتەريالدارىمەن راستالدى.
“اكىمشىلىك قۇقىق بۇزۋشىلىق تۋرالى كودەكستىڭ 434-بابى 1-بولىگىنىڭ (ۇساق بۇزاقىلىق) سانكتسياسى 20 اەك مولشەرىندە ايىپپۇل سالۋعا نە 5-تەن 15 تاۋلىككە دەيىنگى مەرزىمگە اكىمشىلىك قاماۋعا الۋعا اكەلىپ سوعادى. سوت جازالاۋ شاراسىن قۇقىق بۇزۋشىلىق جاسالعانعا دەيىن جانە ودان كەيىنگى ارەكەتتىڭ، مىنەز-قۇلىقتىڭ قوعامدىق قاۋىپتىلىك دارەجەسى مەن سيپاتىن ەسكەرە وتىرىپ تاعايىندادى. وسىلايشا، سوت قاۋلىسىمەن قۇقىق بۇزۋشى اكىمشىلىك قۇقىق بۇزۋشىلىق جاساعانى ءۇشىن كىنالى دەپ تانىلىپ، 10 تاۋلىك مەرزىمگە اكىمشىلىك قاماۋعا الىندى”، – دەلىنگەن حابارلامادا.
ايتا كەتسەك، الەكساندر مەركۋل – ەلىمىزدەگى تانىمال ستەنداپ-كوميكتەردىڭ ءبىرى. ونىڭ پاراقشاسىندا 456 مىڭ جازىلۋشى بار.
