“QazTAG” aqparat agenttıgınıŋ basşysy Äsét Mataevqa ekı aiǧa qamauǧa alu türındegı būltartpau şarasy sanksiialandy, dep habarlaidy "Adyrna".
Oqiǧa 2026 jylǧy 17 nauryzda oryn alǧan. Polisiia mälımetıne säikes, mas küide köşede bolǧan azamattar M. men R. ekı jas jıgıt - A. jäne A.-men janjalǧa tüsken. Janjal sözge keluden bastalyp, keiın kölıkke zaqym keltıru jäne töbeleske ūlasqan.
Alaida Mataevtyŋ advokattary Rena Kerimova men Elena Jigalenok jurnalistıŋ qylmysker emes, kerısınşe, jäbırlenuşı ekenın mälımdedı. Olardyŋ aituynşa, Mataev töbelesıp jatqandardy ajyratuǧa tyrysqan kezde basyna montirovkamen soqqy alǧan.
Advokattar tüsındırgendei, janjaldyŋ tüpkı sebebı – Mataevtyŋ dosy jıgıtterdıŋ bırın qyzben şatastyrǧan.
“Şynynda da älgı jıgıttıŋ syrtqy kelbetı öte oǧaş: ūzyn qyzǧylt sary şaş, qyzǧylt sary qas, şynjyrlar jäne taǧy basqalar. Qaraŋǧyda, tüngı saǧat 02.00 şamasynda, dosymen otyrystan keiın, syrt jaǧynan qaraǧanda oŋai şatastyruǧa bolady”, – dep jazdy Rena Kerimova äleumettık jelıdegı paraqşasynda.
Būǧan qaramastan, jurnalist sot şeşımımen ekı aiǧa qamauǧa alyndy. Alaida oǧan qatysty Qazaqstan Respublikasy Qylmystyq kodeksınıŋ 274-baby (körıneu jalǧan aqparat taratu) boiynşa qylmystyq qudalau toqtatyldy.
Medisinalyq tekseru nätijesınde Mataevtyŋ bas süiegınde jaraqattar anyqtalǧan: aşyq jara, sol jaq maŋdai qoinauynyŋ aldyŋǧy jäne tömengı qabyrǧasynyŋ synuy, gemosinus, sol jaq maŋdai tūsyna soqqy alǧan.
Polisiia oqiǧaǧa qatysqan barlyq azamattardy anyqtap, ūstap otyr. Qūqyq qorǧau organdary janjalǧa qatysqandardyŋ äreketıne qūqyqtyq baǧa berıp, kınälıler zaŋ aldynda jauap beretının eskerttı.
Aita keteiık, şabuyl Mataev pen “QazTAG” bas redaktory Ämır Qasenovke qatysty qylmystyq qudalau aiasynda oryn alǧan. Polisiia qoǧamdyq oryndarda küş qoldanu arqyly mäsele şeşuge jol berılmeitının taǧy da eske saldy.t m
