بىرىككەن اراب امىرلىكتەرى بيلىگى مولدوۆا ازاماتتىعىن العان يزرايلدىك راۆۆين تسۆي كوگاندى ءولتىردى دەگەن كۇدىكپەن وزبەكستاننىڭ ءۇش ازاماتىن قاماۋعا الدى. بۇل تۋرالى ۆۆس جازدى، دەپ حابارلايدى “ادىرنا” ۇلتتىق پورتالى.
ءباا ىشكى ىستەر مينيسترلىگى مالىمەتىنشە، قاماۋعا الىنعانداردىڭ ەكەۋى – 28 جاستا، ال ءۇشىنشىسى – 33 جاستا.
وزبەكستاننىڭ اقپارات قۇرالدارى كۇدىكتىلەردىڭ اتى-ءجونى وليمبوي داۆلاتەروۆ، ماحمۋدجون كەنجابوەۆ جانە ازيزبەك يسمويلوۆ دەپ جازادى. بۇل رەتتە ءباا ىشكى ىستەر مينيسترلىگى ءوز حابارلاماسىندا ولاردىڭ اتى مەن اكەسىنىڭ اتىن عانا جازعان.
ەل بيلىگى كۇدىكتىلەردىڭ كىسەندەگى جانە بەتىن جاۋىپ تۇرعان سۋرەتتەرىن جاريالادى.
فوتو: ۆۆس
Reuters اگەنتتىگى حابارلاعانداي، قۇقىق قورعاۋ ورگاندارى بۇل ادامدارعا رەسمي ايىپ تاعىلعانى تۋرالى ءالى حابارلاعان جوق.
28 جاستاعى ۋلترا پراۆوسلاۆ ءراۆۆينى تسۆي كوگان وتكەن اپتانىڭ بەيسەنبى كۇنى جوعالىپ كەتكەن. ونىڭ دەنەسى جەكسەنبى كۇنى تابىلعان.
«كوگان بىرنەشە جىل دۋبايدا تۇرىپ، سول جەردە ازىق-تۇلىك دۇكەنىن باسقارعان»، - دەپ حابارلايدى Associated Press.
بىرىككەن اراب امىرلىكتەرىنىڭ سىرتقى ىستەر مينيسترلىگى مەن ىشكى ىستەر مينيسترلىگى كوگاننىڭ جوعالۋىن تەرگەۋ تۋرالى ايتقاندا، ونى تەك مولدوۆا ازاماتى دەپ كورسەتكەن.
يزرايل پرەمەر-ءمينيسترى بينيامين نەتانياحۋ بۇل قىلمىستى «انتيسەميتتىك لاڭكەستىك ارەكەت» دەپ اتادى.
بىرىككەن اراب امىرلىكتەرىنىڭ بىرنەشە مىڭعا جۋىق ەۆرەي قاۋىمداستىعىنىڭ مۇشەلەرى كىسى ولىمىنە الاڭداۋشىلىق ءبىلدىرىپ وتىر.
BBC وزبەك قىزمەتىنىڭ رەداكتورى حايرۋللو فايزدىڭ ايتۋىنشا، كۇدىكتىلەر تۋرالى بارلىق اقپارات نەگىزىنەن ءباا ىشكى ىستەر مينيسترلىگىنەن الىنعان.
ءباا-دەگى وزبەكستان ەلشىلىگى BBC ساۋالىنا كەيىنىرەك جاۋاپ بەرۋگە ۋادە بەرگەن، بىراق كوگاندى ءولتىردى دەگەن كۇدىكپەن ەل ازاماتتارىنىڭ قاماۋعا الىنعانى تۋرالى دەرەكتەردى جوققا شىعارماعان.
