پرەزيدەنت جارلىعى: ەربولات دوساەۆ المالىلىقتارمەن ديدارلاستى

2036
Adyrna.kz Telegram

مەملەكەت باسشىسى قاسىم-جومارت توقاەۆتىڭ جارلىعىمەن بەكىتىلگەن حالىقپەن كەزدەسۋدىڭ جاڭا فورماتىنا سايكەس، الماتى قالاسىنىڭ اكىمى ەربولات دوساەۆ المالى اۋدانىنىڭ تۇرعىندارىمەن كەزدەسۋ وتكىزدى، دەپ حابارلايدى «ادىرنا» ءتىلشىسى.  

پرەزيدەنت جارلىعىنىڭ شەڭبەرىندە شاھار باسشىسى  8 اۋداننىڭ ارقايسىسىنىڭ تۇرعىندارىمەن توقسانىنا ءبىر كەزدەسۋ وتكىزۋى ءتيىس. وسىنىڭ اياسىندا ەربولات دوساەۆتىڭ حالىقپەن كەزدەسۋى المالى اۋدانىندا جالعاسىن تاپتى.

قالا باسشىسى اۋداننىڭ دامۋى جانە تۇرعىنداردان تۇسكەن ۇسىنىستار بويىنشا اتقارىلعان جۇمىستار تۋرالى ايتىپ بەردى. كەزدەسۋگە 250-دەن استام ادام كەلدى.

اۋداندا كوممۋنالدىق ينفراقۇرىلىمدى جاڭعىرتۋ وزەكتى ماسەلە بولىپ قالا بەرەدى. اۋداندى تۇراقتى ەلەكترمەن جابدىقتاۋدى قامتاماسىز ەتۋ ءۇشىن 58,5 كم ەلەكتر جەلىلەرى اۋىستىرىلدى، 10 تاراتۋ جانە 50 ترانسفورماتورلىق قوسالقى ستانتسيالار جاڭعىرتىلدى. 2023 جىلى اۋداننىڭ 97,5 كم جەلىلەرى، 3 تاراتۋ جانە 145 ترانسفورماتورلىق قوسالقى ستانتسيالارى قايتا جاڭارتىلادى. سونداي-اق، اۋداندا ۇزىندىعى تيىسىنشە 437 مەتر جانە 415 مەتر سۋ قۇبىرى جانە جىلۋ جەلىلەرى رەكونسترۋكتسيالانادى.

قالا اكىمى ەربولات دوساەۆتىڭ ايتۋىنشا، اۋدانداعى جولداردىڭ پايدالانۋ سيپاتتامالارىن جاقسارتۋ ءۇشىن جالپى ۇزىندىعى 13 كم 16 كوشەگە ورتاشا جوندەۋ جۇرگىزىلدى، 15 قاراشاعا دەيىن 2 كوشەدە تاعى 1155 مەتر جول توسەمى جوندەلەدى.

وقۋشى ورىندارىنىڭ تاپشىلىعىن تومەندەتۋ ءۇشىن اعىمداعى جىلدىڭ باسىندا ەكى مەكتەپتىڭ جانىنداعى 850 ورىندى 2 قوسالقى نىسان ىسكە قوسىلدى. سونىمەن قاتار، 10 قاراشادا 850 ورىندى جەكە گيمنازيا اشىلادى. 2023 جىلى 3 مەكتەپتى كۇردەلى جوندەۋ قاراستىرىلعان.

مەكتەپكە دەيىنگى ۇيىمدارداعى ورىن تاپشىلىعىن قىسقارتۋ ماقساتىندا جىل باسىنان بەرى المالى اۋدانىندا 225 ورىندى 5 جەكەمەنشىك بالاباقشا اشىلدى. جۇمىس ىستەپ تۇرعان №43 بالاباقشا عيماراتىنىڭ ءبىر بولىگىن ساتىپ الۋ ەسەبىنەن 75 قوسىمشا ورىن قامتاماسىز ەتىلدى. №7 مەكتەپكە دەيىنگى مەكەمەنى سەيسميكالىق كۇشەيتۋ اياقتالدى. 2023 جىلى ەكى بالاباقشانى كۇردەلى جوندەۋ جوسپارلانعان.

مەديتسينالىق قىزمەت كورسەتۋدىڭ، اسىرەسە اعا بۋىن وكىلدەرىنىڭ وسى قىزمەتكە قادامدىق قولجەتىمدىلىگىن قامتاماسىز ەتۋ ءۇشىن ۇوس قالالىق ەمحاناسىنىڭ عيماراتىن كۇردەلى جوندەۋگە جانە 500 كەلۋشىگە ارنالعان جاڭا ەمحانا سالۋعا دايىندىق جۇرگىزىلۋدە. ەكى دەنساۋلىق ساقتاۋ مەكەمەسىندە دە جۇمىس 2023 جىلعا جوسپارلانعان.

اۋداندا قاتتى جاۋىن-شاشىن كەزىندە سۋ باسۋ ماسەلەسى وزەكتى بولىپ قالۋدا. تج جەلىسى بويىنشا 12 ۋچاسكەنى جويۋ جۇمىستارى جۇرگىزىلۋدە. 4 ۋچاسكە بويىنشا جۇمىستار اياقتالدى. جىل سوڭىنا دەيىن ماقاتاەۆ كوشەسىنىڭ بويىندا جالپى ۇزىندىعى 3,6 كم كوللەكتور قالپىنا كەلتىرىلەدى، قوسىمشا 2,3 كم جاڭا ارىق جەلىلەرى جانە رايىمبەك داڭعىلى بويىنا 1,6 كم كانال سالىنادى. قاراشا ايىندا 52 ۋچاسكەدە 34 كم ارىق جەلىسىن قايتا قۇرۋ جانە سالۋ باستالادى. جۇمىستاردى 2024 جىلدىڭ سوڭىنا دەيىن اياقتاۋ جوسپارلانۋدا.

قالانىڭ تاريحي ورتالىعى رەتىندە اۋدان تۇرعىندارى ءۇشىن وزەكتى ماسەلە شاعىنقاباتتى ۇيلەر مەن جاسىل قوردى ساقتاۋ بولىپ تابىلادى. بيىلعى جىلى 40 شاعىنقاباتتى ۇيلەردىڭ قاسبەتتەرى جوندەلدى، 15 قاراشاعا دەيىن قالعان 4 قاسبەتى جوندەلەدى. جاسىل قوردى جاسارتۋ جانە جاڭارتۋ باعدارلاماسى اياسىندا 5400 اعاشقا سانيتارلىق كەسۋ جۇرگىزىلدى، جالپى پايدالانۋ ورىندارىنداعى اپاتتى اعاشتاردىڭ 660 ءدىڭى كەسىلدى. قاراشا ايىنىڭ سوڭىنا دەيىن كەسىلگەن اعاشتاردىڭ ورنىنا 2500 جاس اعاش وتىرعىزىلادى.

سونداي-اق، قالا اكىمى ەربولات دوساەۆ اۋداننىڭ قوعامدىق قاۋىپسىزدىگىن قامتاماسىز ەتۋ شارالارى تۋرالى دا حاباردار ەتتى. ماسەلەن، جىل سوڭىنا دەيىن 541 بەينەكامەرا ورناتىلادى. قولدانىستاعىلارعا قوسىمشا 400 كامەراعا 38 «سەرگەك» اوك ورناتىلادى. جالپى، جۇمىس اياقتالعاننان كەيىن بەينەباقىلاۋ كامەرالارىنىڭ جالپى سانى 1469 بىرلىكتى قۇرايتىن بولادى.

«حالىق قاتىساتىن بيۋدجەت» باعدارلاماسى بويىنشا اۋداندا 800 ملن تەڭگەگە 39 جوبا ىسكە اسىرىلدى. ياعني، 2 گۇلزار، 8 قوعامدىق ورىن جانە 21 اۋلا اباتتاندىرىلدى.

الماتى اكىمىمەن كەزدەسۋ بارىسىندا تۇرعىندار جولداردى جوندەۋ، كارىز جانە ەلەكتر جەلىلەرىن اباتتاندىرۋ جانە ت.ب. ماسەلەلەردى كوتەردى.

پىكىرلەر