فوتو: پاۆلودار وبلىسىنىڭ پروكۋراتۋراسى
پاۆلودار وبلىسىندا كەيىنگى ءۇش جىلدا سالىنعان 30 نىسان تەكسەرىلىپ، قۇرىلىس كەزىندە بىرقاتار زاڭبۇزۋشىلىق انىقتالدى، دەپ حابارلايدى “ادىرنا”.
سونىڭ سالدارىنان مەملەكەت بيۋدجەتىنە 484 ملن تەڭگەدەن استام شىعىن كەلگەن. بۇل تۋرالى وبلىستىق پروكۋراتۋرا اقپارات تاراتتى.
تەكسەرۋ بارىسىندا قۇرىلىس باسقارماسىنىڭ لاۋازىمدى تۇلعالارى ورىندالماعان جۇمىستاردى قابىلداپ، ولاردىڭ اقىسىن تولەگەنى بەلگىلى بولدى. سونداي-اق مەردىگەرلەردەن كەلىسىمشارت تالاپتارىن بۇزعانى ءۇشىن ءوسىمپۇل وندىرىلمەگەن.
بۇدان بولەك، مەردىگەرلەر قۇرىلىس ماتەريالدارى مەن جابدىقتاردى جوبا تالاپتارىنا ساي كەلمەيتىن ارزان ونىمدەرگە الماستىرعان. ماسەلەن، جوبادا مەتالل شاتىر جابىندىسىنىڭ قالىڭدىعى 0,7 ميلليمەتر بولۋى كەرەك بولسا، ءىس جۇزىندە 0,5 ميلليمەترلىك ماتەريال قولدانىلعان. ال قابىرعالاردى پەنوپلەكس ماتەريالىمەن قاپتاۋدىڭ ورنىنا كادىمگى پەنوپلاست پايدالانىلعان.
امبۋلاتوريالاردا سەرتيفيكاتتالعان مەديتسينالىق شامداردىڭ ورنىنا كەڭسەلەرگە ارنالعان قاراپايىم LED-شامدار ورناتىلعان.
سونىمەن قاتار №1 پاۆلودار قالالىق اۋرۋحانادا مونتاجدالماعان جانە ىسكە قوسىلماعان جابدىقتار قابىلدانعان. وپەراتسيالىق بلوكتاردىڭ ءبىر بولىگى پايدالانۋعا دايىن بولماعان. قىمبات مەديتسينالىق جابدىقتار قاپتاماسىنان شىعارىلماي، وندىرىستىك ليفتىلەر مەن جەلدەتۋ جۇيەسى دە ىسكە قوسۋعا ازىرلەنبەگەن.
قازىر انىقتالعان دەرەكتەر بويىنشا اكىمشىلىك جانە قىلمىستىق ىستەر قوزعالعان. ءاربىر زاڭبۇزۋشىلىق جەكە قارالىپ جاتىر.
وبلىستىق قۇرىلىس باسقارماسى باسشىسىنىڭ ورىنباسارى ازات ساتاباەۆ بارلىق ەسكەرتۋ قابىلدانىپ، ولاردى جويۋ جۇمىستارى جۇرگىزىلىپ جاتقانىن ايتتى. ونىڭ سوزىنشە، كەپىلدىك مىندەتتەمەلەرىن ورىنداتۋ ماقساتىندا سوت تالقىلاۋى باستالعان. نىساندار بويىنشا كەپىلدىك مەرزىمى – 10 جىل.
