«اتىراۋ قالالىق قۇرىلىس ءبولىمى» مەملەكەتتىك مەكەمەسى 3-قاراشادا جالپى قۇنى 1 ميلليارد 267 ميلليون تەڭگە بولاتىن ەكى تەندەر جاريالادى، - دەپ حابارلايدى ادىرنا ۇلتتىق پورتالى Satypalu.gov.kz/ سايتىنا سىلتەمە جاساپ.
«اتىراۋ قالاسىنان 2 بولمەلى پاتەر ساتىپ الۋ» دەگەن اتاۋمەن جاريالانعان ءبىرىنشى مەملەكەتتىك ساتىپ الۋدىڭ قۇنى - 527 250 000.00 تەڭگەگە باعالانعان. بۇل قارجىعا ەكى بولمەلى 19 ءۇي ساتىپ الىنباق. قالالىق قۇرىلىس ءبولىمى ءار ەكى بولمەلى ءۇيدى ساتىپ الۋعا 27 750 000 تەڭگە بولگەن.
ال، ەكىنشى تەندەر ءدال سول كۇنى «اتىراۋ قالاسىنان 3 بولمەلى پاتەر ساتىپ الۋ» دەگەن اتاۋمەن جاريالانىپ، 20 ءۇي ساتىپ الۋعا شەشىم شىعارىلعان. 20 ءۇي الۋعا وبلىستىق بيۋدجەتتەن 740 000 000.00 تەڭگە جۇمسالماق. ياعني، قۇرىلىس ءبولىمى ەكى بولمەلى 19 پاتەردىڭ ارقايسىسىن 27 750 000 تەڭگەگە، ءۇش بولمەلى 20 پاتەردىڭ ارقايسىسىن 37 000 000 تەڭگەگە ساتىپ الماق.
جالپى 39 ءۇيدى ساتىپ الۋعا باعىتتالعان ەكى تەندەردىڭ قۇنى 1 ميلليارد 267 ميلليون تەڭگەنى قۇرايدى.
تەحنيكالىق سيپاتتامانىڭ «لوتتىڭ سيپاتتاماسى» دەگەن بولىمىندە 3 بولمەلى ءۇيدىڭ الاڭى 40-60, 2 بولمەلى ءۇيدىڭ الاڭى 20-40 شارشى مەتردەن كەم بولماۋى كەرەكتىگى كورسەتىلگەن. ال، «فۋنكتسيونالدىق، تەحنيكالىق، ساپالىق جانە پايدالانۋ مىنەزدەمەسىن سيپاتتاۋ» دەگەن بولىمدە ءۇش بولمەلى پاتەردىڭ اۋدانى كەمىندە 97, ەكى بولمەلى پاتەردىڭ اۋدانى 75 شارشى مەتردەن كەم بولماۋى قاجەتتىگى تۋرالى جازىلعان. سونداي-اق، ءۇيدىڭ ءار شارشى مەترىنىڭ قۇنى 370 000 تەڭگەدەن اسپاۋى كەرەكتىگى دە كورسەتىلگەن.
تەحنيكالىق سيپاتتاماداعى بۇل سايكەسسىزدىك قاتەلىك پە؟ اتىراۋ قالالىق قۇرىلىس ءبولىمى ءۇشىن 97 شارشى مەتر مەن 40-60 شارشى مەتر اۋماقتىڭ ايىرماسى جوق پا؟
مەملەكەت الەۋمەتتىك تۇرمىسى تومەن وتباسىلار مەن مۇمكىندىگى شەكتەۋلى جانداردى باسپانامەن قامتاماسسىز ەتۋ ماقساتىندا ءتۇرلى باعدارلامالاردى جۇزەگە اسىرىپ كەلە جاتىر. اتىراۋ قالالىق قۇرىلىس ءبولىمى سول باعدارلاما اياسىندا ساتىپ العالى وتىرعان ۇيلەردىڭ شارشى مەترىن جاڭىلتپاشقا اينالدىرىپ وتىرۋىنىڭ استارىندا نە بار؟
بۇل سۇراقتى ءتيىستى مەكەمەگە جولدادىق. جاۋابى كەلىپ جاتسا، دەرەۋ جاريالايتىن بولامىز.
قانات بىرلىكۇلى
ادىرنا ۇلتتىق پورتالى
