QR Memlekettık qyzmet ısterı agenttıgı jol qūrylysy salasynda jüzdegen milliard teŋgenıŋ tiımsız jūmsalǧanyn mälımdedı, dep habarlaidy “Adyrna” ūlttyq portaly.
Agenttık 2025 jyly jürgızılgen sybailas jemqorlyq täuekelderıne qatysty syrtqy taldau nätijelerın jariialady.
Esepke säikes, öŋırlerdegı tekserıs barysynda jol qūrylysynyŋ smetalyq qūny 11 mlrd teŋgege negızsız arttyrylǧany anyqtalǧan.
Sonymen qatar 362 eskırgen jobalyq-smetalyq qūjat tırkelıp, olardy äzırleuge 23 mlrd teŋge tiımsız jūmsalǧan. Būdan bölek, qūny 27 mlrd teŋge bolatyn 324 nysan mındettı memlekettık saraptamadan ötpegen.
Agenttık deregınşe, 70 kompaniia jūmys täjıribesı turaly jalǧan anyqtamalar paidalanu arqyly jalpy somasy 408 mlrd teŋgenı qūraityn kelısımşarttarǧa qol jetkızgen.
Vedomstvo ökılderı merdıgerler men submerdıgerlerge qatysty qandai şara qoldanylǧanyn jäne keltırılgen şyǧynnyŋ ötelgen-ötelmegenın naqtylamady. Alaida josparlau, qūrylys jäne tehnikalyq qadaǧalau salalaryndaǧy jüielı mäselelerdı joiu üşın 80-nen astam ūsynys äzırlengenı habarlandy.
Qazırgı taŋda Qazaqstanda Ūlttyq jol aktivterı sapasy ortalyǧy eskertulerı joiylǧanǧa deiın joldardy paidalanuǧa beruge tyiym salynǧan.
Agenttık mälımetınşe, jaŋa platforma aqparatty ortalyqtandyru arqyly önım sapasy turaly derekterdı būrmalau täuekelın azaitady. Būl şaralar 2026 jylǧa jol salasyna bölıngen 360 mlrd teŋgeden astam biudjet qarajatynyŋ aşyq ärı tiımdı igerıluın qamtamasyz etuge baǧyttalǧan.
