ەۆەرەستتى باعىندىرعان قازاقستاندىق الپينيست ايەل «الەمنىڭ جەتى شىڭىنا» شىعۋ باعدارلاماسى تۋرالى حابارلادى. بۇل تۋرالى قازاقستان رەسپۋبليكاسىنىڭ تۋريزم جانە سپورت ءمينيسترى ەرمەك مارجىقپاەۆتىڭ ۇلتتىق-پاتريوتتىق «Kazakh Everest Team» ەكسپەديتسياسىنىڭ قاتىسۋشىلارىمەن كەزدەسۋ بارىسىندا بەلگىلى بولدى، دەپ حابارلايدى “ادىرنا” ۇلتتىق پورتالى ktk.kz سايتىنا سىلتەپ.
ەكسپەديتسيا قۇرامىندا اڭىزعا اينالعان قازاقستاندىق الپينيست ماقسۇت جۇماەۆ، ەۆەرەستتى باعىندىرعان تۇڭعىش قازاقستاندىق الپينيست ايەل انار بوراشەۆا جانە 2024 جىلعى ماۋسىمدا العاشقى جەتى الپينيست قاتارىندا عالامشاردىڭ ەڭ بيىك شىڭىنا كوتەرىلگەن المير قىمباتبايۇلى بار.
كەزدەسۋ قازاقستاننىڭ ۇلتتىق قۇراماسىن 2024 جىلعى XXXIII جازعى وليمپيادا ويىندارىنا شىعارىپ سالۋ ءراسىمى اياسىندا ءوتتى. كەزدەسۋ بارىسىندا مينيستر ۇلتتىق-پاتريوتتىق «Kazakh Everest Team» ەكسپەديتسياسىنىڭ قاتىسۋشىلارىن ءىلتيپات بىلدىرە وتىرىپ قارسى الىپ، ەۆەرەستكە كوتەرىلۋىمەن قۇتتىقتاپ، ءالپينيزمدى دامىتۋداعى ۇلەستەرى ءۇشىن قۇرمەت گراموتالارىمەن ماراپاتتاپ، قازاقستان تۋىمەن جاڭا شىڭداردى باعىندىرۋعا تىلەكتەستىك ءبىلدىردى. ءوز كەزەگىندە «Kazakh Everest Team» قاتىسۋشىلارى مينيسترگە ەۆەرەستكە كوتەرىلۋ تۋرالى بايانداپ، وزدەرىنىڭ الداعى جوسپارلارىن ايتتى.
انار بوراشەۆا «الەمنىڭ جەتى شىڭى» باعدارلاماسى تۋرالى ايتىپ، ونىڭ ەكەۋى – ازياداعى ەۆەرەست پەن افريكاداعى كيليماندجارو ءساتتى باعىندىرىلعانىن حابارلادى. ءالپينيستىڭ ايتۋىنشا، ول بيىلعى تامىز ايىندا كاۆكازداعى ەلبرۋس شىڭىنا (5642 م) شىعۋدى جوسپارلاپ وتىر.
قالعان ءتورت شىڭعا – ارگەنتيناداعى اكونكاگۋاعا (6962 م), انتاركتيكاداعى ۆينسونعا (4892 م), الياسكاداعى (اقش) دەناليگە (6194 م) جانە اۋسترالياداعى پۋنچاك-دجاياعا (4884 م) قازاقستاندىق الپينيست 2025 جىلدىڭ سوڭىنا دەيىن كوتەرىلۋدى جوسپارلاپ وتىر.
قازاقستاننىڭ ۇلتتىق قۇراماسىن شىعارىپ سالۋ سالتاناتتى ءراسىمى بارىسىندا ەۆەرەستكە شىققان العاشقى قازاق ءالپينيسى سپورتشىلارعا جەڭىس تىلەپ، ءار ادامنىڭ ءوز ەۆەرەستى بار ەكەنىن اتاپ ءوتتى.
«ەگەر الپينيستەر ءۇشىن جەتىستىكتەردىڭ ەڭ بيىك نۇكتەسى الەمدەگى ەڭ بيىك تاۋ بولسا، سپورتشىلار ءۇشىن ول – وليمپيادا چەمپيوندىعى. ءبىزدىڭ ماقساتىمىز ەڭ بيىك شىڭعا ءساتتى كوتەرىلۋ عانا ەمەس، سونىمەن قاتار جاڭا چەمپيوندار بۋىنىن شابىتتاندىرۋ بولدى. بۇگىن مەن سىزدەرگە جەڭىس تىلەيمىن جانە جاقىندا فرانتسياداعى وليمپيادا ويىندارىندا قازاقستاننىڭ تۋىن كورەتىنىمىزگە ۇمىتتەنەمىن»، - دەدى انار بوراشەۆا.
Everest Development وكىلى اتاپ وتكەندەي، كومپانيا ءوز قىزمەتكەرلەرىنىڭ باستامالارىن قولداۋدى ودان ءارى جالعاستىرادى، اتاپ ايتقاندا، انار بوراشەۆانىڭ الەمنىڭ جەتى شىڭىنا شىعۋ جوباسىن قولداۋدى كوزدەپ وتىر.
«ءبىز ءوز قىزمەتكەرلەرىمىزدىڭ ارماندارىن كەز كەلگەن باعىتتا قولداۋ قاجەت دەپ سانايمىز جانە «الەمنىڭ جەتى شىڭى» جوباسىمەن ءبىز ارمانداردى جۇزەگە اسىرۋدى جالعاستىرامىز»، - دەدى Everest Development كومپانياسى ديرەكتورىنىڭ دامۋ جونىندەگى ورىنباسارى سۇڭقار قارابالين مينيسترمەن كەزدەسۋ بارىسىندا.
كەزدەسۋ سوڭىندا «Kazakh Everest Team» قاتىسۋشىلارى قازاقستان رەسپۋبليكاسىنىڭ تۋريزم جانە سپورت ءمينيسترى ەرمەك مارجىقپاەۆقا ەستەلىك مۇز شاپقىش قۇرالىن تابىس ەتتى.
