قازاقستان كونستيتۋتسياسىنىڭ 30 جىلدىعىنا وراي الپينيست ءارى مادەنيەت قايراتكەرى الىبەك قايىربەك كونستيتۋتسيانى گيمالايداعى 6180 مەتر بيىكتىكتەگى ايلەند پيك شىڭىنا الىپ شىقتى، دەپ حابارلايدى "ادىرنا" ۇلتتىق پورتالى Informburo.kz سايتىنا سىلتەمە جاساپ.
بۇل ورلەۋ ونىڭ "الەم شىڭدارىنداعى دومبىرا" اتتى ەرەكشە جوباسىنىڭ ءبىر بولىگى. جوبا — "الەمنىڭ جەتى شىڭى" حالىقارالىق باستاماسى اياسىندا جۇزەگە اسىرىلىپ جاتىر. ونىڭ ماقساتى — قازاق مادەنيەتىن، سونىڭ ىشىندە دومبىرادا ورىندالاتىن ۇلتتىق مۋزىكانى الەمگە تانىتىپ، بۇل اسپاپتى الەمنىڭ ەڭ بيىك شىڭدارىن باعىندىرعان مۋزىكالىق اسپاپ رەتىندە گيننەستىڭ رەكوردتار كىتابىنا ەنگىزۋ.
ايلەند پيك شىڭىنا جاسالعان ەكسپەديتسيا 15 كۇنگە سوزىلدى جانە ءالپينيستىڭ باستاماسىمەن ۇيىمداستىرىلدى. بۇل ورلەۋ ونىڭ سپورتتىق جەتىستىگى عانا ەمەس، سونىمەن قاتار وتانسۇيگىشتىگى مەن ازاماتتىق جاۋاپكەرشىلىگىنىڭ كورىنىسى بولدى.
الىبەك قايىربەك قازاقستان رەسپۋبليكاسىنىڭ كونستيتۋتسياسى ءماتىنىن بيىك شىڭعا شىعارۋ تۋرالى ۇسىنىسپەن كونستيتۋتسيالىق سوتقا جۇگىنگەن. ولار بۇل يدەيانى قولداپ، كونستيتۋتسيانىڭ رەسمي نۇسقاسىن ۇسىندى.
الپينيست بيىكتىك پەن اۋا رايىنىڭ قيىندىقتارىنا توتەپ بەرىپ، كونستيتۋتسيانى الەمدەگى تانىمال گيمالاي شىڭدارىنىڭ بىرىنە الىپ شىقتى.
"مەن ءۇشىن كونستيتۋتسيا – بارلىق زاڭداردىڭ شىڭى. بۇل جاي عانا قۇجات ەمەس، ول – ءبىزدىڭ بىرلىگىمىزدىڭ، قۇقىقتارىمىز بەن بوستاندىقتارىمىزدىڭ رۋحاني تىرەگى جانە سيمۆولى. نەگىزگى زاڭ مەن دومبىرانى ارقالاپ شىققاندا اۋىرلىق ەمەس، كۇش سەزىندىم. ەكسپەديتسيانىڭ قاتال جاعدايلارىندا بۇل ەكەۋى ماعان موتيۆاتسيا مەن رۋح بەردى. قازاقستاننىڭ ءدال وسى سيمۆولدارىمەن ايلەند پيك شىڭىن باعىندىرعانىما ماقتانامىن", – دەدى الىبەك قايىربەك.
بۇل تاريحي ورلەۋ ەۆەرەست ەتەگىندە ۇلى قازاق كومپوزيتورى نۇرعيسا تىلەنديەۆتىڭ 100 جىلدىعىنا وراي "القيسسا" كۇيىن ورىنداۋمەن دە ەستە قالدى.
