فوتو: رۋستام نابيەۆ
ۋفالىق الپينيست رۋستام نابيەۆ 20 مامىر كۇنى ەۆەرەست شىڭىنا كوتەرىلدى. ول مۇنى تەك ەكى قولىنىڭ كۇشىمەن جاساپ، تاريحتا العاش رەت ەۆەرەستتى اياقسىز باعىندىرعان ادام اتاندى. بازالىق لاگەردەن شىڭعا دەيىنگى جول وعان تۋرا ءبىر اپتا ۋاقىت العان، دەپ حابارلايدى "ادىرنا".
رۋستام الەۋمەتتىك جەلىدەگى پاراقشاسىندا شىڭعا تاڭعى 8:16-دا كوتەرىلگەنىن حابارلادى. ول رەسەيدەن نەپالعا 7 ساۋىردە ۇشىپ كەتكەن. ەۆەرەستكە شىعۋ اسا قاۋىپتى بولعاندىقتان، الدىن الا وسيەت جازىپ، ۋفادا سالىنىپ جاتقان ءۇيىنىڭ بارلىق تولەمدەرىن جاۋىپ كەتكەن.
ءساۋىر ايى مەن مامىردىڭ العاشقى جارتىسىندا رۋستام بيىكتىككە بەيىمدەلۋ جاتتىعۋلارىنان ءوتتى. ال 13 مامىر - ءوزىنىڭ 34 جاس تۋعان كۇنىندە ەۆەرەستتىڭ بازالىق لاگەرىنەن جولعا شىقتى. ونىمەن بىرگە بەس شەرپا جانە ءۇش جەكە جولسەرىك بولدى.
15 مامىردا نابيەۆ حۋمبۋ مۇزدى وتكەلىنەن تەك قولىمەن وتكەنىن ايتتى. بۇل وعان 15 ساعات ۋاقىت الىپ، الپينيستىك ومىرىندەگى ەڭ قيىن سىناقتاردىڭ ءبىرى بولعان.
مۇزدى وتكەلدەن كەيىنگى العاشقى بيىكتىك لاگەرى 6100 مەتردە ورنالاسقان. سول جەردەن سوڭعى رەت ءوزى بايلانىسقا شىققان. ودان كەيىنگى جول تۋرالى اقپاراتتى بازالىق لاگەردەگى كوماندا مۇشەلەرى جەتكىزىپ وتىرعان.
17 مامىردا ولاردىڭ توبى 7178 مەتر بيىكتىكتەگى ءۇشىنشى لاگەرگە جەتتى. قىسقا ايالدامادان كەيىن ءتورتىنشى لاگەرگە قاراي جولعا شىعىپ، وعان 14 ساعاتتا بارعان.
19 مامىردا رۋستام 8400 مەتر بيىكتىكتەگى «بالكون» دەپ اتالاتىن ارالىق نۇكتەگە جەتتى. سول كۇنى كەشكى 23:00-دە ولار شىڭعا قايتا كوتەرىلە باستادى. جوسپارلانعانداي، تاڭەرتەڭ الەمنىڭ ەڭ بيىك نۇكتەسىنە كوتەرىلدى.
رۋستام نابيەۆ 2015 جىلى ومبىداعى اسكەري كازارمانىڭ قۇلاۋى سالدارىنان اۋىر جاراقات الىپ، ەكى اياعىنان ايىرىلعان.
سوڭعى بەس جىل ىشىندە ول تەك قولىنىڭ كۇشىمەن ەلبرۋستىڭ ەكى شىڭىن (5642 جانە 5621 م), ماناسلۋدى (8163 م), اراراتتى (5165 م), كازبەكتى (5033 م), كيليماندجارونى (5895 م), اكونكاگۋانى (6962 م), ەندى مىنە ەۆەرەستى (8848 م) باعىندىردى.
