گەرمانيادا «Axel Springer Freedom Foundation» كوممەرتسيالىق ەمەس ۇيىمى اتى-ءجونى جاسىرىنعان اۋعاندىق ايەلگە باتىلدىق ءۇشىن سىيلىق بەرەتىنىن جاريالادى. ۇيىمنىڭ ءباسپاسوز قىزمەتىنىڭ حابارلاۋىنشا، قاۋىپسىزدىك ماقساتىندا ماراپاتتاۋشىنىڭ اتى-ءجونىن ايتۋ مۇمكىن ەمەس، ويتكەنى ايەل اۋعانستاندا قىزدارعا ارنالعان استىرتىن مەكتەپتەردىڭ قۇپيا جەلىسىن قۇرعان، دەپ حابارلايدى "ادىرنا" پورتالى.
«سىيلىق دەموكراتيا مەن ەركىندىككە ەرەكشە ۇلەس قوسقان ادامدارعا بەرىلەدى»، - دەلىنگەن حابارلامادا.
اۋعانستان - قىزداردىڭ التىنشى سىنىپتى بىتىرگەننەن كەيىن مەكتەپكە بارۋىنا رەسمي تۇردە تىيىم سالىنعان الەمدەگى جالعىز ەل. بۇل تىيىمدى 2021 جىلدىڭ تامىزىندا ەلدەگى بيلىكتى باسىپ العاننان كەيىن «تاليبان» راديكالدى قوزعالىسى ەنگىزگەن. بۇل شەشىمگە جەرگىلىكتى قوعام بەلسەندىلەرى، حالىقارالىق ۇيىمدار مەن شەتەلدىك ساياساتكەرلەر قارسىلىق ءبىلدىردى، بىراق تاليبان ءالى كۇنگە دەيىن ءجاسوسپىرىم قىزداردى مەكتەپكە جىبەرمەيدى.
«مەن ءۇشىن ەڭ اۋىر ادىلەتسىزدىك - اۋعانستانداعى ايەلدەردىڭ قيىن جاعدايىن اشىق ايتا الماۋى. وزىمە قاۋىپ توندىرەمىن دەپ قورقىپ، بۇل ەرەكشە كۇندى وتباسىممەن بىرگە تويلاي دا المايمىن. ەرلىگى ءۇشىن ماراپاتتى ءوز باسىم قابىلداپ، ەلىمە ماقتانىشپەن ورالعىم كەلەدى. بۇل ماراپات مەنى بۇدان دا كوپ جۇمىس ىستەۋگە ىنتالاندىرادى", - دەپ جازدى ماراپات يەسى.
ماراپات اۋعان ايەلدەرىنىڭ روبوتوتەحنيكا كومانداسىنىڭ نەگىزىن قالاۋشى رويا ماحبۋبقا بەرىلدى.
«Axel Springer Freedom Foundation» سىيلىعىنىڭ اقشالاي قۇنى 50 مىڭ ەۋرو ەكەنىن ايتا كەتەيىك.
Axel Springer Freedom Foundation - ەركىن ەمەس ەلدەردىڭ قۇقىق قورعاۋشىلارىن قولدايتىن كوممەرتسيالىق ەمەس ۇيىم.
