قوستاناي قالاسىندا رەسپۋبليكالىق رەفەرەندۋم وتەتىن كۇنى تۇرعىندارعا قولايلى جاعداي جاساۋ ماقساتىندا قوعامدىق كولىكتە جول ءجۇرۋ ۋاقىتشا تەگىن بولادى.
قالالىق اكىمدىكتىڭ مالىمەتىنشە، 15 ناۋرىز كۇنى ساعات 07:00-دەن 13:00-گە دەيىن قالا ىشىندەگى اۆتوبۋستاردا جول ءجۇرۋ اقىسىز ۇيىمداستىرىلادى. بۇل شارا قالا تۇرعىندارىنىڭ ءوز سايلاۋ ۋچاسكەلەرىنە ەش كەدەرگىسىز جەتۋىنە جانە ماڭىزدى قوعامدىق-ساياسي ناۋقانعا قاتىسۋىنا مۇمكىندىك بەرەدى.
جەرگىلىكتى بيلىك وكىلدەرىنىڭ ايتۋىنشا، قابىلدانعان شەشىم رەفەرەندۋم كۇنى ازاماتتاردىڭ بەلسەندىلىگىن ارتتىرۋعا جانە تۇرعىندارعا قولايلى جاعداي جاساۋعا باعىتتالعان.
سونىمەن قاتار ناۋرىز مەيرامىن مەرەكەلەۋ كۇندەرى دە قوعامدىق كولىك جۇمىسىنا وزگەرىستەر ەنگىزىلەدى. 21 جانە 22 ناۋرىزدا، نەگىزگى مەرەكەلىك ءىس-شارالار وتەتىن ۋاقىتتا، قالالىق اۆتوبۋستاردىڭ جۇمىس ۋاقىتى ءبىر ساعاتقا ۇزارتىلادى. ياعني سوڭعى اۆتوبۋستار سوڭعى ايالدامالاردان ادەتتەگى 22:00 ورنىنا 23:00-دە قاتىنايتىن بولادى.
بۇل شارالار قالا تۇرعىندارى مەن قوناقتارىنىڭ قالا ىشىندە ەركىن قوزعالۋىنا، مەرەكەلىك ءىس-شارالارعا قاتىسىپ، ولاردىڭ اياقتالعاننان كەيىن ۇيلەرىنە ىڭعايلى جەتۋىنە مۇمكىندىك بەرەدى.
