ەلىمىزدە جۇزەگە اسىرىلىپ جاتقان قوعامدىق-ساياسي باستامالار مەن جالپىحالىقتىق دەڭگەيدە تالقىلانىپ جاتقان ماڭىزدى ماسەلەلەردە قوعام دا قاراپ قالىپ جاتقان جوق، دەپ حابارلايدى "ادىرنا" ۇلتتىق پورتالى.
بەلسەندى ازاماتتار ءوز پىكىرلەرىن بىلدىرۋدە. شىمكەنتتىك اقىندار دا بۇل ۇدەرىستەن تىس قالعان جوق. ولار ەل بولاشاعىنا قاتىستى وي-تۇجىرىمدارىن ءداستۇرلى جىر ۇلگىسىمەن ورنەكتەپ، وزەكتى تاقىرىپتاردى ولەڭمەن ورنەكتەپ جەتكىزىپ جاتىر.
الەۋمەتتىك جەلىدە تاراعان ۆيدەودان ء بىرجان بايتۋوۆ، نۇرلان ەسەنقۇلوۆ، انار جاپپارقۇلوۆا اقىنداردىڭ ەلدىك مۇددە، مەملەكەتتىك ءتىلدىڭ مارتەبەسى، ۇلتتىق قۇندىلىقتاردى ساقتاۋ جانە قوعامدىق تۇتاستىق ماسەلەلەرىن ارقاۋ ەتكەن ولەڭ جولدارىن جاريا ەتتى.
شىمكەنتتىك اقىندار تاۋەلسىز مەملەكەت رەتىندە قابىلداناتىن ءاربىر ماڭىزدى شەشىم حالىقتىڭ تاريحي ساناسى مەن ۇلتتىق بولمىسىنا نەگىزدەلۋى ءتيىس دەگەن ويدى العا تارتادى.
«تاۋەلسىزدىك العالى انا تىلدە،
جازىلعان العاش زاڭى ەكەن ەلدىڭ» دەگەن ولەڭ جولدارى، اسىرەسە، تاۋەلسىزدىك كەزەڭىندە تۇڭعىش رەت زاڭنىڭ قازاق تىلىندە قابىلدانۋىن اتاپ كورسەتىپ، مەملەكەتتىك ءتىلدىڭ زاڭ شىعارۋ ىسىندەگى ناقتى مارتەبەسىن ايقىنداۋعا باعىتتالعان.
سونىمەن قاتار ءداستۇرلى وتباسى قۇندىلىقتارىن ساقتاۋ، ۇلتتىق تاربيە ينستيتۋتىن نىعايتۋ، قوعامداعى تۇراقتىلىق پەن كەلىسىمدى قامتاماسىز ەتۋ سىندى باعىتتار دا اقىندار نازارىنان تىس قالماپيى. ولار تاريحي تامىردان اجىراماي، زامان تالابىنا ساي دامۋ قاجەتتىگىن تىلگە تيەك ەتىپ، ەل بىرلىگىن باستى ۇستانىم رەتىندە كورسەتەدى.
جەر مەن تابيعي بايلىقتىڭ حالىق يگىلىگىنە قىزمەت ەتۋى، الەۋمەتتىك ادىلدىك قاعيداتتارىنىڭ ساقتالۋى ماسەلەسىن دە اقىندار تىلگە تيەك ەتىپ، اتاپ كورسەتەدى.
جالپى، اقىنداردىڭ ازاماتتىق ۇستانىمى - قازاق پوەزياسىنىڭ ەجەلگى داستۇرىمەن ساباقتاس. قاي كەزەڭدە دە ءسوز يەلەرى حالىقتىڭ وي-تىلەگىن جەتكىزىپ، ەلدىك ماسەلەلەردە ءۇن قوسىپ وتىرعان. بۇگىنگى شىعارماشىلىق وكىلدەرى دە وسى ءۇردىستى جالعاستىرىپ، قوعامدىق پىكىر الاڭىندا بەلسەندىلىك تانىتىپ كەلەدى.
