قازاقستان پرەزيدەنتى قاسىم-جومارت توقاەۆتىڭ تاپسىرماسى بويىنشا پارلامەنت سەناتىنىڭ توراعاسى ماۋلەن اشىمباەۆ يراننىڭ استاناداعى ەلشىلىگىنە بارىپ، يران حالقىنا جانە قازا تاپقانداردىڭ تۋىستارىنا قازاقستان اتىنان كوڭىل ايتتى، دەپ حابارلايدى "ادىرنا" ۇلتتىق پورتالى.
سەنات توراعاسى يراننىڭ قازاقستانداعى توتەنشە جانە وكىلەتتى ەلشىسى ءالي اكبار دجوۋكارمەن كەزدەسىپ، قازاقستان تاراپى بولعان وقيعاعا بايلانىستى تەرەڭ الاڭداۋشىلىق بىلدىرەتىنىن جەتكىزدى.
قايعىلى جاعداي سالدارىنان يراننىڭ جوعارعى رۋحاني كوشباسشىسى سەيەد ءالي حامەنەي، ەل باسشىلىعىنىڭ بىرقاتار وكىلدەرى جانە بەيبىت تۇرعىندار، ونىڭ ىشىندە بالالار قازا تاپقانى حابارلاندى. كەزدەسۋ بارىسىندا ماۋلەن اشىمباەۆ قازاقستان پرەزيدەنتى حالىقارالىق داۋلاردى تەك ساياسي جانە ديپلوماتيالىق جولمەن شەشۋدى قولدايتىنىن اتاپ ءوتتى. سونداي-اق قازاقستان حالىقارالىق قۇقىق نورمالارىن جانە بىرىككەن ۇلتتار ۇيىمى جارعىسىن قاتاڭ ساقتاۋ قاجەت دەگەن ۇستانىمدى قولدايتىنى ايتىلدى.
سەنات توراعاسى يراننىڭ قازاقستان ءۇشىن جاقىن كورشى ءارى سەنىمدى سەرىكتەس ەكەنىن ايتىپ، ەلىمىزدىڭ ايماقتاعى جانجالدى بەيبىت جولمەن رەتتەۋگە ءوز ۇلەسىن قوسۋعا دايىن ەكەنىن جەتكىزدى.
ەسكە سالا كەتەيىك، 28 اقپاندا يزرايل يران اۋماعىنا اۋقىمدى اسكەري شابۋىل جاساعان. كەيىن دونالد ترامپ يرانعا قارسى اسكەري وپەراتسيانىڭ باستالعانىن مالىمدەدى. جاۋاپ رەتىندە تەگەران تاياۋ شىعىستاعى جانە يزرايل اۋماعىنداعى امەريكالىق اسكەري بازالارعا سوققى جاساعان.
