"قانداس" مارتەبەسىن الۋ ءۇشىن جەتى مىڭعا جۋىق ءوتىنىش تۇسكەن

قازاقستاندا قانداستار مەن قونىس اۋدارۋشىلاردى قابىلداۋعا ارنالعان Migration.enbek.kz پورتالى قىزمەت ەتۋدە، دەپ حابارلايدى "ادىرنا" ۇلتتىق پورتالى.

قر ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، 2025 جىلى پورتال ارقىلى 18 639 ءوتىنىش وڭدەلگەن. ال تىركەلگەن پايدالانۋشىلاردىڭ جالپى سانى 18 303 ادامدى قۇرايدى.

مينيسترلىك دەرەگىنشە، پورتال ارقىلى ەڭ كوپ سۇرانىسقا يە قىزمەتتەر قاتارىندا ەتنيكالىق قازاق مارتەبەسىن الۋ، ىشكى قونىس اۋدارۋ، جۇمىسپەن قامتۋ جانە الەۋمەتتىك قولداۋ ماسەلەلەرى بار.

سونىمەن قاتار، «قانداس» مارتەبەسىن بەرۋ بويىنشا 6 928 ءوتىنىش ءتۇسىپ، ونىڭ 3 859-ى ماقۇلدانعان. ال ەڭبەك شارتىنا قول قويۋ نيەتى تۋرالى كەلىسىم – 5 508 ءوتىنىش تۇسسە، قونىس اۋدارۋدىڭ وڭىرلىك كۆوتاسى بويىنشا 1 856 ادام ءوتىنىش بەرگەن.

ال 1330 ادام كوشۋگە ارنالعان سۋبسيديا تولەۋ بويىنشا ءوتىنىم بەرگەن.

ۆەدومستۆو وكىلدەرى پورتالدىڭ زاماناۋي تسيفرلىق شەشىمدەر ارقىلى مەملەكەتتىك ورگاندار مەن ازاماتتار اراسىنداعى ءوزارا بايلانىستى جەڭىلدەتىپ، شەتەلدىك جۇمىس كۇشىن تارتۋعا باعىتتالعان بيزنەس-ۇدەرىستەردى دە ىسكە اسىرىپ وتىرعانىن اتاپ ءوتتى.