پارسى شىعاناعى جاقتاعى سوعىستىڭ بەتالىسىن بولجاۋ قيىن. قاڭعىعان درون مەن زىمىران كەز كەلگەن ەلگە جەتۋى مۇمكىن. بىلتىر 12 كۇندىك قاقتىعىس كەزىندە ءبىر درون ماڭعىستاۋ جەرىنە قۇلاعان. بىزدىكى ەمەس ەكەنى انىق ەدى. ءوز باسىم يران جاقتان كەلگەن شىعار دەپ توپشىلادىم. ال بۇگىن تۇركيا جەرىنە زىمىران قالدىعى قۇلادى. سوندىقتان ەرەكشە ساقتىق كەرەك.
پرەزيدەنت قاسىم-جومارت توقاەۆ ءتيىستى قۇرىلىم باسشىلارىنا تاپسىرما بەرىپتى. پرەزيدەنتتىڭ كومەكشىسى ءھام ءباسپاسوز حاتشىسى ايبەك سماديار جازدى.
"پرەزيدەنت قاسىم-جومارت توقاەۆ پرەمەر-مينيسترگە، كۇشتىك قۇرىلىمداردىڭ باسشىلارىنا، «سامۇرىق-قازىنا» ۇلتتىق ءال-اۋقات قورى مەن ۇلتتىق كومپانيالاردىڭ جەتەكشىلەرىنە، سونداي-اق ايماق اكىمدەرىنە تىرشىلىكتى قامتاماسىز ەتەتىن نىسانداردىڭ، كولىك، ەنەرگەتيكا جانە كوممۋنالدىق ينفراقۇرىلىمنىڭ، سونىڭ ىشىندە اۋەجايلاردىڭ، تەڭىز جانە وزەن پورتتارىنىڭ قاۋىپسىزدىك شارالارىن كۇشەيتۋدى تاپسىردى. اتالعان جۇمىستى ۇيلەستىرۋ قاۋىپسىزدىك كەڭەسىنىڭ حاتشىسىنا جۇكتەلدى",-دەدى ول.
ياعني جوعارعى باس قولباسشى كەز كەلگەن ستسەناريگە دايار بولۋدى تاپسىرىپ وتىر. ءتيىستى قۇرىلىم جەتەكشىلەرى قاڭعىپ كەلۋى مۇمكىن زىمىران مەن درون قاۋپىن ەستەن شىعارماۋى قاجەت دەگەن ءسوز. جارىلىس زارداپتارىنان بولەك، بوسقىندار اعىنى دا پايدا بولۋى ىقتيمال. سوسىن حالىقتىڭ سەرگەك ءارى اۋىزبىرشىلىگىنىڭ مىقتى بولماعى كەرەك. بىرەۋمىزدىڭ پارسىلاردى، تاعى بىرەۋمىزدىڭ ارابتاردى، ۇشىنشىلەرىمىزدىڭ امەريكالىقتاردى جاقتاۋىمىز تەك وسى الەۋمەتتىك جەلىدە قالعانى ءجون-اۋ. مەملەكەتتىڭ ۇستانىمىن دە تۇسىنۋگە تىرىسارمى، بالكىم. ايتپاقشى، قازىر اۋە قورعانىسى كۇشتەرى كىرپىك قاقپايتىن ءسات.
