«روساتوم» يرانداعى بۋشەر اتوم ەلەكتر ستانتسياسىنداعى قۇرىلىس جۇمىستارىن توقتاتتى. بۇل تۋرالى كورپوراتسيا باسشىسى الەكسەي ليحاچەۆ مالىمدەدى، دەپ حابارلايدى «ادىرنا» ءتىلشىسى BBC-گە سىلتەمە جاساپ.
ايتۋىنشا، شەشىمگە تاياۋ شىعىستاعى قاقتىعىستار سەبەپ بولعان.
«ارينە، يرانداعى نىساندا جۇمىس توقتاتىلدى. ءبىز قىزمەتكەرلەرىمىزدىڭ ەلدى مەكەندەردەن شىقپاۋىن جانە قۇرىلىسقا قاتىستى اشىق الاڭداردا سيرەك بولۋىن قاتاڭ باقىلايمىز»، – دەدى ليحاچەۆ.
ول اسكەري قاقتىعىستارعا بايلانىستى جاعدايدى بولجاۋ قيىن ەكەنىن، بىراق جاڭا ەنەرگوبلوكتاردى ىسكە قوسۋعا كۇش سالاتىندارىن اتاپ ءوتتى.
ء«بىز يران حالقى مەن ۇكىمەتى الدىنداعى جاۋاپكەرشىلىگىمىزدى جاقسى تۇسىنەمىز»،-دەدى باسشى.
ليحاچەۆ يران اتوم ونەركاسىبىنىڭ باسشىلىعىمەن بايلانىس ۇزىلگەنىن جەتكىزدى. ايتۋىنشا، قازىرگى تاڭدا بۋشەر اەس-ىنە قاۋىپ بار.
«ستانتسيانىڭ فيزيكالىق قورعانىس سىزىعىنان بىرنەشە كيلومەتر قاشىقتىقتا جارىلىستار ەستىلەدى. ولار ستانتسياعا باعىتتالماعان، اسكەري نىساندارعا باعىتتالعان، بىراق قاۋىپ ايقىن تۇردە ارتۋدا»،- دەدى ول.
ليحاچەۆ اەس تۇتاستىعىنىڭ بۇزىلۋى ۇلكەن اۋماقتاردىڭ لاستانۋىنا اكەلۋى مۇمكىن ەكەنىن ايتتى.
