اقش پرەزيدەنتى دونالد ترامپ يرانعا جاڭا ۇسىنىس جاسادى. CNN اقپاراتتىق اگەنتتىگىنىڭ دەرەككوزدەرىنە سۇيەنسەك، ۆاشينگتون تەگەرانعا ۋران بايىتۋدان تولىق باس تارتۋىنىڭ ورنىنا ازاماتتىق يادرولىق باعدارلاماسىن دامىتۋعا $30 ميلليارد كولەمىندە كومەك بەرۋدى ۇسىنادى، دەپ حابارلايدى “ادىرنا”.
بۇل جوبانى قارجىلاندىرۋدى پارسى شىعاناعىنداعى مەملەكەتتەر جۇزەگە اسىرۋى ءتيىس، الايدا ناقتى قاي ەلدەر ەكەنى حابارلامادا كورسەتىلمەگەن.
جوسپارعا سايكەس، ەگەر تەگەران كەلىسىم شارتتارىن قابىلداسا، بۇعاتتالعان $6 ميلليارد يران اكتيۆتەرى بوساتىلادى.
ۇسىنىستاعى تارماقتاردىڭ ءبىرى — اقش-تىڭ سوڭعى اۋە سوققىسى كەزىندە جويىلعان فوردو كەشەنىنىڭ ورنىنا جاڭا يادرولىق نىسان سالۋ. بۇل جاڭا نىساندا ۋران بايىتۋعا ارنالعان ينفراقۇرىلىم بولمايدى.
ترامپ بۇعان دەيىن يراننىڭ يادرولىق باعدارلاماسى «تولىعىمەن جويىلدى» دەپ مالىمدەگەن بولاتىن. الايدا باق-تاعى مالىمەتتەر بۇل سوققىنىڭ اۋىرلىعىنا كۇمان كەلتىرەدى، كەيبىر اقپاراتتاردا بايىتىلعان ۋراننىڭ ءبىر بولىگى شابۋىلعا دەيىن ەۆاكۋاتسيالانعانى ايتىلعان.
