مادەنيەت جانە ونەر قىزمەتكەرلەرى كۇنىنە وراي اقوردادا ارنايى سالتاناتتى جيىن ءوتتى، دەپ حابارلايدى "ادىرنا" ۇلتتىق پورتالى.
ءىس-شارا بارىسىندا پرەزيدەنت قاسىم-جومارت توقاەۆ ەلىمىزدىڭ بىرقاتار ونەر مايتالماندارىن مەملەكەتتىك ناگرادالارمەن ماراپاتتادى.
مەملەكەت باسشىسىنىڭ جارلىعىمەن قازاقستاننىڭ حالىق ءارتىسى ماقپال ءجۇنىسوۆا II دارەجەلى «بارىس» وردەنىمەن ماراپاتتالدى. ال ءانشى ءارى دومبىراشى تاتيانا بۋرميستروۆا «وتان» وردەنىنە يە بولدى. سونداي-اق ميحايل لەرمونتوۆ اتىنداعى ۇلتتىق ورىس دراما تەاترىنىڭ اكتريساسى مارينا گانتسەۆا III دارەجەلى «بارىس» وردەنىمەن ماراپاتتالاتىنى بەلگىلى بولدى.
پرەزيدەنت ءوز سوزىندە كاسىبي مەرەكە اياسىندا مادەنيەت سالاسىنىڭ دامۋىنا ەلەۋلى ۇلەس قوسقان بىرقاتار ونەر قايراتكەرلەرىنە «قازاقستاننىڭ حالىق ءارتىسى» اتاعى بەرىلگەنىن اتاپ ءوتتى. بيىل جالپى 120 مادەنيەت جانە ونەر قىزمەتكەرى مەملەكەتتىك ماراپاتقا يە بولماق.
سونىمەن قاتار جيىندا مادەني مۇراعا قاتىستى ماڭىزدى جاڭالىقتار ايتىلدى. مەملەكەتتىك كەڭەسشى ەرلان قاريننىڭ مالىمەتىنشە، ماڭعىستاۋ جەراستى مەشىتى مەن ابايدىڭ قارا سوزدەرى يۋنەسكو-نىڭ تىزىمىنە ەنگىزىلۋى مۇمكىن. بۇل ماسەلە شىلدە ايىندا وڭتۇستىك كورەيادا وتەتىن ارنايى جيىندا قارالادى.
