قىزىلوردا وبلىسى ارال اۋدانىنىڭ تۇرعىنى ەگىز بالاسىن جارتى ميلليون تەڭگەگە ساتىپ جىبەرگەن، دەپ حابارلايدى «ادىرنا» ءتىلشىسى.
وبلىستىق سوتتىڭ مالىمەتىنشە، ايەل ەگىز بالاسى بولاتىنىن ءبىلىپ، ولاردى ساتۋعا شەشىم قابىلداعان. وسىلايشا ءوزىنىڭ تانىستارى ەرلى-زايىپتى سوتتالۋشىلار ج. مەن ك.-مەن كەزدەسىپ، بوسانعاننان كەيىن بالالارىن ولارعا ساتۋ ارقىلى بەرۋ تۋرالى ءوزارا كەلىسىمگە كەلگەن.
وعان سايكەس ەرلى-زايىپتىلار ايەلگە «Kaspi bank» قوسىمشاسى ارقىلى ءدارى-دارمەك پەن ازىق-تۇلىك الۋ ءۇشىن 2023 جىلدىڭ قاڭتار-ءساۋىر ايلارىندا ءارتۇرلى سوممادا بارلىعى 60 000 تەڭگە اۋدارعان.
«ايىپتالۋشى ساۋىردە بالالاردى ومىرگە اكەلىپ، ولاردى ج. مەن ك.-عا بەرگەن. 200 000 تەڭگەنى بەرگەننەن كەيىن “ساتىپ الۋشىلار” كەلىسكەن سومانى ءبولىپ تولەۋ تۋرالى سويلەسكەن. وسىلايشا نارەستەلەردىڭ اناسىنا 252 000 تەڭگە جانە تاعى 34 000 تەڭگەنى بولەك اۋدارىلعان. ايىپتالۋشى د. ەرلى-زايىپتىلاردان نەبارى 546 000 تەڭگە العان»،—دەلىنگەن حابارلامادا.
كەيىنىرەك ايىپتالۋشى مەن ەرلى-زايىپتىلار نوتاريۋسقا جۇگىنگەن. بالالاردىڭ بيولوگيالىق اناسى ولاردى اسىراپ الۋعا جانە كەيىننەن قورعانشىلىق جاساۋعا كەلىسىمىن بەرگەن.
«قىزىلوردا وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنىڭ ۇكىمىمەن بالالارىن ساتقان سوتتالۋشى د.، كىنالى دەپ تانىلىپ، وعان 8 جىل مەرزىمگە باس بوستاندىعىنان ايىرۋ جازاسى تاعايىندالدى. سوتتالۋشىلار ج. ك.، كىنالى دەپ تانىلىپ، ولارعا 2 جىل مەرزىمگە باس بوستاندىعىنان ايىرۋ جازاسى تاعايىندالدى»،– دەلىنگەن سوت حابارلاماسىندا.
