استانا قالاسىنداعى قر ۇلتتىق اكادەميالىق كىتاپحاناسىندا جازۋشى، دراماتۋرگ جولتاي ءالماشۇلىنىڭ جاڭا تۋىندىلارى – «وليگارح قازاق»، «كوكتۇرىك سارىنى» جانە «كلياتۆا ليۋبۆي»كىتاپتارىنىڭ تانىستىرىلىمى ءوتتى.
ادەبي كەش بارىسىندا قالامگەر شىعارماشىلىعىنىڭ يدەيالىق مازمۇنى، كوركەمدىك ەرەكشەلىگى جانە قازىرگى ادەبي ۇدەرىستەگى ورنى كەڭىنەن تالقىلاندى. ءىس-شاراعا زيالى قاۋىم وكىلدەرى، جازۋشىلار، ادەبيەتتانۋشىلار، مادەنيەت قايراتكەرلەرى مەن وقىرماندار قاتىستى.
كەزدەسۋ اياسىندا اۆتور جاڭا ەڭبەكتەرىنىڭ جازىلۋ تاريحى مەن نەگىزگى تاقىرىپتىق-يدەيالىق باعىتتارى تۋرالى ايتىپ بەردى. قاتىسۋشىلار جازۋشىنىڭ شىعارمالارىنداعى تاريحي تانىم، ۇلتتىق قۇندىلىقتار مەن زاماناۋي قوعام كەلبەتى ۇيلەسىم تاپقانىن اتاپ ءوتتى.
سونداي-اق كەش بارىسىندا قالامگەرگە قازاقستان رەسپۋبليكاسى پارلامەنتى سەناتى توراعاسى ماۋلەن اشىمباەۆتىڭ قۇتتىقتاۋ حاتى تابىستالدى.
جيىن سوڭىندا ادەبي ورتا وكىلدەرى اۆتور شىعارماشىلىعىنىڭ وزەكتىلىگىنە توقتالىپ، جاڭا تۋىندىلاردىڭ ۇلتتىق ادەبي كەڭىستىكتەگى ماڭىزىن ەرەكشە اتاپ ءوتتى. كىتاپ تانىستىرىلىمى وقىرمان مەن قالامگەر اراسىنداعى مازمۇندى سۇحبات الاڭىنا اينالدى.
