مەملەكەت باسشىسى قاسىم-جومارت توقاەۆ تۇركى مەملەكەتتەرى ۇيىمى (تمۇ) گەوساياسي جوبا ەمەس ەكەنىن ايتىپ، ۇيىمدى اسكەري اليانس رەتىندە سيپاتتاۋشىلارعا جاۋاپ بەردى. بۇل تۋرالى اقوردا جازدى، دەپ حابارلايدى "ادىرنا".
"ەڭ باستىسى، جاڭا فورماتتاعى جۇمىس ۇيىمنىڭ ماقسات-مىندەتتەرىنە ساي بولىپ، وعان كەرى اسەرىن تيگىزبەۋى كەرەك. مىسالى، سوڭعى كەزدە ۇيىمىمىزدى اسكەري اليانس رەتىندە سيپاتتايتىن وي-پىكىرلەر ايتىلىپ ءجۇر. ولاردىڭ تەرىس پەيىلى بىزگە انىق، ماقساتتارى – ەلدەستىرۋ ەمەس ەكەنى دە بەلگىلى. قازاقستان ونداي ۇستانىمدى جوققا شىعارۋ كەرەك دەپ سانايدى", - دەيدى پرەزيدەنت.
مەملەكەت باسشىسىنىڭ سوزىنشە، تۇركى الەمىنىڭ بىرلىگىن نىعايتۋ اسا ماڭىزدى، كەزەك كۇتتىرمەيتىن باسىمدىق.
"تۇركى مەملەكەتتەرى ۇيىمى – گەوساياسي جوبا ەمەس، اسكەري ۇيىم دا ەمەس. بۇل – باۋىرلاس ەلدەردىڭ ساۋدا-ەكونوميكالىق، جوعارى تەحنولوگيالىق، تسيفرلىق جانە مادەني-گۋمانيتارلىق ىنتىماقتاستىعىن نىعايتاتىن بىرەگەي الاڭ. مۇنداي ۇستانىم ەلىمىز ءۇشىن – ماڭىزدى باسىمدىق، سەبەبى، بۇل ۇلتتىق مۇددە تۇرعىسىنان دا ءتيىمدى ەكەنى انىق. "التاۋ الا بولسا، اۋىزداعى كەتەدى، تورتەۋ تۇگەل بولسا، توبەدەگى كەلەدى" دەگەن اتالى ءسوز – بارىمىزگە ورتاق. تۇركى الەمى ءاردايىم تاتۋ بولىپ، العا قويعان ماقساتىنان اۋىتقىماي، بىرلەسە دامي بەرۋى كەرەك", - دەيدى مەملەكەت باسشىسى.
پرەزيدەنتتىڭ سوزىنشە، بۇگىنگى باسقوسۋ تامىرى ءبىر، تاريحى ورتاق ەلدەرىمىزدىڭ اۋىزبىرشىلىگىن ارتتىرا تۇسەرى ءسوزسىز.
تۇركى مەملەكەتتەرى ۇيىمى (تمۇ) بەس ەلدى بىرىكتىرەدى: قازاقستان، تۇركيا، ازەربايجان، وزبەكستان جانە قىرعىزستان. تۇرىكمەنستان مەن ۆەنگريا - باقىلاۋشى ەلدەر. ۇيىم تۇركى حالىقتارى اراسىنداعى ساياسي، ەكونوميكالىق جانە مادەني ىنتىماقتاستىقتى نىعايتۋ ءۇشىن قۇرىلعان.
تۇركىستانعا تۇركى الەمىنىڭ رۋحاني استاناسى دەگەن رەسمي مارتەبە 2021 جىلعى ناۋرىزدا بەرىلگەن. سودان بەرى قالا ءىرى حالىقارالىق كەزدەسۋلەر وتەتىن تۇراقتى الاڭعا اينالدى.
بيىلعى كەزدەسۋدىڭ تاقىرىبى - "جاساندى ينتەللەكت جانە تسيفرلىق دامۋ". كوشباسشىلار جي، IT-ينفراقۇرىلىم جانە مەملەكەتتىك قىزمەتتەردى تسيفرلاندىرۋ سالاسىنداعى بىرلەسكەن جوبالاردى تالقىلاپ جاتىر. بىلتىر تمۇ ەلدەرى اراسىنداعى تاۋار اينالىمى 13 ميلليارد دوللارعا جۋىقتادى.
2026 جىل ۇيىم ءۇشىن سيمۆوليكالىق داتا سانالادى: 1926 جىلى باكۋدە وتكەن العاشقى سەزگە 100 جىل تولىپ وتىر. سونىمەن قاتار تمۇ-عا جاڭا سەرىكتەستەر دە قىزىعۋشىلىق تانىتىپ جاتىر - "تمۇ+" فورماتىنا اقش، جاپونيا، قىتاي، ۇلىبريتانيا، يزرايل جانە ۋكراينا نازار اۋدارىپ وتىر.
