يتاليا ۇكىمەتى مەكتەپتەرگە قاتىستى جاڭا ەرەجەلەر ەنگىزۋدى جوسپارلاپ وتىر، دەپ حابارلايدى “ادىرنا”.
RBC دەرەگىنشە، ەلدىڭ پرەمەر-ءمينيسترى دجوردجا مەلوني مەكتەپتەردە بۋركا مەن نيكاب كيۋگە تىيىم سالۋدى، ءبىر سىنىپتاعى شەتەلدىك وقۋشىلار سانىن شەكتەۋدى جانە كەيبىر اتا-انالارعا يتاليان ءتىلىن مىندەتتى تۇردە ۇيرەتۋدى كوزدەيتىن زاڭ جوباسىن جاريالادى.
مەلوني جوسپارلانعان شارالاردى 20 قىركۇيەكتە ريمدە وتكەن «يتاليا اعايىندارى» پارتياسىنىڭ جاستار قاناتى فەستيۆالىندە تانىستىردى. ونىڭ ايتۋىنشا، ءتيىستى قۇجات جاقىن ۋاقىتتا يتاليا مينيسترلەر كەڭەسىنىڭ قاراۋىنا ۇسىنىلۋى ءتيىس.
ۇسىنىستاردىڭ ءبىرى مەكتەپتەردە بەتتى تولىق نەمەسە جارتىلاي جاۋىپ تۇراتىن بۋركا مەن نيكاب كيۋگە تىيىم سالۋدى كوزدەيدى.
«مەكتەپكە اشىق جۇزبەن كەلۋ كەرەك»، – دەدى يتاليا پرەمەر-ءمينيسترى.
سونداي-اق، ۇكىمەت سىنىپتارداعى شەتەلدىك وقۋشىلاردىڭ سانىن دا زاڭمەن رەتتەۋدى جوسپارلاپ وتىر. قولدانىستاعى ەرەجەگە سايكەس، يتاليا مەكتەپتەرىندەگى ءبىر سىنىپتا شەتەلدىك وقۋشىلاردىڭ ۇلەسى ادەتتە 30 پايىزدان اسپاۋى ءتيىس. سونىمەن قاتار ەرەكشە جاعدايلاردا بۇل شەكتەۋدەن اۋىتقۋعا مۇمكىندىك بار.
باق مالىمەتىنشە، قازىر يتاليا مەكتەپتەرىندەگى وقۋشىلاردىڭ شامامەن 11,6 پايىزى يتاليا ازاماتتىعىنا يە ەمەس.
بۇدان بولەك، مەكتەپ جۇيەسىنە بەيىمدەلۋدە قيىندىقتارعا تاپ بولعان شەتەلدىك وقۋشىلاردىڭ اتا-انالارىنا يتاليان ءتىلىن ۇيرەنۋدى مىندەتتەۋ ۇسىنىلىپ وتىر.
