تۇركىستان وبلىسى، بايدىبەك اۋدانىنىڭ 40 جاستاعى تۇرعىنى، كوپبالالى انا جانساۋلە دوسپانوۆا ءۇش ۇلدى دۇنيەگە اكەلدى. بۇل تۋرالى 4 ساۋىردە وبلىس اكىمىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«نارەستەلەردىڭ سالماعى – 1990, 1975 جانە 1728 گرامم بولدى. باتىر اناعا دارىگەرلەر كەسار تىلىگى ارقىلى وتا جاساپ، بوساندىرىپ العان. قازىرگى تاڭدا مەرزىمىنەن بۇرىن تۋعان سابيلەردىڭ جاعدايى بىرقالىپتى»،—دەلىنگەن حابارلامادا.
«بايدىبەكتىك باتىر انا» بۇگىندە 8 بالانىڭ اناسى اتانىپ وتىر. ۇشەمدەرگە تۋىستارى ناريمان، نۇريمان جانە نۇرمان ەسىمدەرىن قويعان. كەلىنشەك ۇشەم بوساناتىنىن العاش ەستىگەن كەزدە قوبالجىعانىن ايتادى.
ايتا كەتەيىك، بيىل تۇركىستان وبلىسىنىڭ №2 پەريناتالدىق ورتالىعىندا 24 ەگىز بەن 1 ۇشەم دۇنيەگە كەلگەن.
