اقوردا رەزيدەنتسياسىندا ححV قىسقى وليمپيادا ويىندارىنىڭ جەڭىمپازى ميحايل شايدوروۆ پەن ونىڭ جاتتىقتىرۋشىلارىن ماراپاتتاۋ ءراسىمى ءوتتى. بۇل تۋرالى بۇگىن، 25 اقپاندا اقوردانىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
پرەزيدەنت قاسىم-جومارت توقاەۆ سالتاناتتى ءىس-شارادا سويلەگەن سوزىندە قازاقستان ءۇشىن بۇل وليمپيادانىڭ ورنى ەرەكشە ەكەنىن ايتتى.
«وتانداسىمىز ميحايل شايدوروۆ تاماشا ونەر كورسەتتى. مانەرلەپ سىرعاناۋدان التىن مەدالعا يە بولىپ، كوك تۋىمىزدى وليمپ شىڭىنا كوتەردى. سوندىقتان ميحايلعا العىسىمدى ءبىلدىرىپ، قۇتتى بولسىن دەگىم كەلەدى. اقوردادا جينالىپ وتىرعان ادامدارعا، ەڭ الدىمەن، ميحايلدىڭ اكەسى مەن جەڭىمپازدىڭ باپكەرىنە ريزاشىلىعىمدى ايتامىن. بارشاڭىزدى تاعى دا شىن جۇرەكتەن قۇتتىقتايمىن! سىزدەر قاجىرلى جانە تاباندى ەڭبەكتىڭ ارقاسىندا ميحايلدى مىقتى سپورتشى، ناعىز دارىن يەسى رەتىندە بۇكىل الەمگە پاش ەتتىڭىزدەر. حالقىمىز ميحايلدى ماقتان تۇتادى، ال جاس بۋىن ودان ۇلگى الادى. وليمپيادا جەڭىمپازى بولۋ – بيىك ماقسات جولىندا كەز كەلگەن قيىندىقتى جەڭۋ، ياعني، ۇزاق ءارى كۇردەلى جولعا دايىن بولۋ دەگەن ءسوز. تەمىردەي تارتىپپەن كۇن سايىن تىنىمسىز جۇمىس ىستەگەن ادام عانا زور تابىسقا جەتەرى انىق»،– دەدى مەملەكەت باسشىسى.
پرەزيدەنت XXV قىسقى وليمپيادا ويىندارىنداعى جەتىستىكتەرى ءۇشىن ميحايل شايدوروۆتى ءىى دارەجەلى «بارىس» وردەنىمەن، باپكەرى، جاتتىقتىرۋشى-كەڭەسشى الەكسەي ۋرمانوۆتى ءىى دارەجەلى «دوستىق» وردەنىمەن ماراپاتتادى.
«قۇرمەت» وردەنى قازاقستاننىڭ مانەرلەپ سىرعاناۋدان ۇلتتىق قۇراما كومانداسىنىڭ باس جاتتىقتىرۋشىسى اسەم قاسانوۆاعا، مانەرلەپ سىرعاناۋدان جاتتىقتىرۋشى ستانيسلاۆ شايدوروۆقا، قازاقستاندىق كونكيمەن مانەرلەپ سىرعاناۋ وداعىنىڭ پرەزيدەنتى باۋىرجان ەرالىعا تابىستالدى.
وليمپيادا چەمپيونى ميحايل شايدوروۆ كورسەتكەن قولداۋى ءۇشىن قاسىم-جومارت توقاەۆقا جانە بارشا وتانداسىمىزعا ريزاشىلىعىن ءبىلدىردى.
«قۇرمەتتى قاسىم-جومارت كەمەلۇلى! بۇل كەزدەسۋگە وليمپيادا چەمپيونى رەتىندە قاتىسۋ – مەن ءۇشىن زور مارتەبە. التىن مەدال – مەنىڭ عانا ەمەس، اتا-انامنىڭ، باپكەرلەرىمنىڭ جانە مەن ءۇشىن الاڭداپ، قولداۋ كورسەتكەن بارشا قازاقستاندىقتىڭ جەڭىسى. بۇل ايانباي تەر توگىپ جۇمىس ىستەسەڭ، جاقىن جانداردىڭ ماحابباتى مەن سەنىمى بولسا، ارمانداردىڭ ورىندالاتىنىن كورسەتەدى. پرەزيدەنت مىرزا، ءسىزدىڭ قولداۋىڭىزدىڭ ارقاسىندا سپورتشىلار ۇلكەن جەتىستىكتەرگە، جاڭا تاريحي رەكوردتارعا قول جەتكىزىپ ءجۇر. مەن وليمپيادا التىنىمەن شەكتەلمەيمىن. الدىمدا ۇزاق جول بار. ەلىمنىڭ سەنىمىن اقتاپ، جاس ۇرپاققا ۇلگى بولىپ، حالقىمىزدىڭ مەرەيىن ۇستەم ەتكىم كەلەدى. سۇيىكتى وتانىما، قازاقستانىما قىزمەت ەتەمىن»، – دەدى ميحايل شايدوروۆ.
