يتاليانىڭ ۆەرونا قالاسىندا ميلان-كورتينا-2026 قىسقى وليمپيادا ويىندارىنىڭ جابىلۋ سالتاناتى ءوتتى. بۇل تۋرالى ۇوك جازدى، دەپ حابارلايدى «ادىرنا» ءتىلشىسى.
سالتاناتتى كەش ەۋروپاداعى ەڭ تانىمال تاريحي نىسانداردىڭ ءبىرى - ەكى مىڭ جىلدان استام تاريحى بار ءارى يۋنەسكو-نىڭ بۇكىلالەمدىك مۇرالار تىزىمىنە ەنگەن ارەنا دي ۆەرونا امفيتەاترىندا ۇيىمداستىرىلدى. قىسقى وليمپيادا تاريحىندا العاش رەت جابىلۋ سالتاناتى وسىنداي كونە امفيتەاتردا ءوتىپ، تاريحي ورىن زاماناۋي ساحنا كەيپىنە ەندى.
ءراسىم بارىسىندا جارىستار اياقتالعاننان كەيىنگى بىرلىكتى بىلدىرەتىن سپورتشىلار شەرۋى ءوتتى. اتلەتتەر امفيتەاترعا سالتاناتتى تۇردە كىردى.
بارلىق قۇرامانىڭ تۋ ۇستاۋشىلارى دەلەگاتسيالاردان بولەك ءجۇرىپ ءوتتى. قازاقستاننىڭ مەملەكەتتىك تۋىن يتاليادا التىن مەدال جەڭىپ العان مانەرلەپ سىرعاناۋشى ميحايل شايدوروۆ الىپ شىقتى.
يتالياداعى وليمپيادادا قازاقستان قۇراماسىنىڭ اتىنان 36 سپورتشى 10 سپورت تۇرىندە سىنعا ءتۇستى. مەدالدىق ەسەپتە ەلىمىز ءبىر التىن جۇلدەمەن 19-ورىنعا تۇراقتادى.
قازاقستان قۇراماسىنىڭ بىرنەشە وكىلى ءوز جارىستارىندا العاشقى وندىققا كىردى. يليا ميزەرنىح تاۋەلسىز قازاقستان تاريحىنداعى ەڭ ۇزدىك ناتيجەنى تىركەدى. شاڭعىمەن ۇلكەن تۇعىردان سەكىرۋدە ول سەگىزىنشى ورىن الىپ، وسى سپورت تۇرىندەگى ۇلتتىق رەكوردتى جاڭارتتى. كونكيمەن جۇگىرۋشى نادەجدا موروزوۆا 3000 مەتر قاشىقتىقتا التىنشى بولىپ مارەگە جەتتى. بۇل - 1998 جىلى ليۋدميلا پروكاشەۆا وليمپيادادا قولا مەدال العاننان بەرگى ەڭ جوعارى ناتيجە. سونىمەن قاتار موروزوۆا 5000 مەتردە توعىزىنشى، كوماندالىق ءىز كەسۋ سايىسىندا سەگىزىنشى ورىن يەلەندى. ونىڭ كوماندالاسى ەليزاۆەتا گولۋبەۆا دا ءۇش رەت ۇزدىك وندىققا ەندى. ول 1500 مەتردە - جەتىنشى، 3000 مەتردە - ونىنشى ورىن الدى. گولۋبەۆا جانە موروزوۆامەن بىرگە كوماندالىق ءىز كەسۋ سايىسىندا ارينا يلياششەنكو دا سەگىزىنشى ناتيجە كورسەتتى. قازاقستاندىق كونكيمەن جۇگىرۋشى ەۆگەني كوشكين 500 مەتر قاشىقتىقتا توعىزىنشى ورىنعا تۇراقتادى. شورت-ترەكشى دەنيس نيكيشا 500 مەتر قاشىقتىقتا جەتىنشى ورىن الىپ، جەكەلەي سايىستاعى ءوزىنىڭ ەڭ جوعارى ناتيجەسىنە قول جەتكىزدى. فريستايل-اكروباتيكادان ارالاس كوماندالىق باسەكەدە قازاقستان قۇراماسى جەتىنشى بولدى. بۇل سىندا اسىلحان اسان، رومان يۆانوۆ جانە ايانا جولداس ونەر كورسەتتى. ايتا كەتەيىك، ەرلەر اراسىندا رومان يۆانوۆ 13-ورىن الىپ، ۇلتتىق قۇراما تاريحىنداعى ۇزدىك ناتيجەنى جاڭارتتى. موگۋلشى اناستاسيا گورودكو دا ۇزدىك وندىققا ەندى. ول پاراللەلدى موگۋلدا شيرەك فينالعا دەيىن جەتىپ، سەگىزىنشى ورىن الدى. وسى ديستسيپلينادا پاۆەل كولماكوۆ توعىزىنشى ساتىعا جايعاستى. مانەرلەپ سىرعاناۋدان ايەلدەر اراسىندا سوفيا سامودەلكينا قازاقستان تاريحىندا ەڭ جوعارى ناتيجەنى تىركەدى. قىسقا جانە ەركىن باعدارلامانىڭ قورىتىندىسى بويىنشا ول ونىنشى ورىنعا تۇراقتادى.
ءداستۇر بويىنشا سالتاناتتى ءراسىمنىڭ نەگىزگى بولىگى اياقتالعان سوڭ وليمپيادا تۋى ءتۇسىرىلىپ، كەلەسى قىسقى وليمپيادانى قابىلدايتىن ەل – فرانتسيا وكىلدەرىنە تابىستالدى. 2030 جىلعى قىسقى وليمپيادا ويىندارى وسى مەملەكەتتە وتەدى. سونداي-اق ۇيىمداستىرۋشى ەل الداعى دودانىڭ «تاڭ شۋاعى» اتتى تانىستىرىلىمىن ۇسىندى. ودان كەيىن يتاليالىق سازگەر ليۋدوۆيكو ەيناۋديدىڭ اۋەنىمەن ميلان مەن كورتينادا جانعان 2026 جىلعى وليمپيادا الاۋى ءسوندىرىلدى.
