ميلان وليمپياداسىنىڭ چەمپيونى، مانەرلەپ سىرعاناۋشى ميحايل شايدوروۆتىڭ جەڭىسىنە مەملەكەت قانشالىقتى ۇلەس قوسقانى تۋرالى تۋريزم جانە سپورت مينيسترلىگى ايتىپ بەردى، دەپ حابارلايدى "ادىرنا".
مينيسترلىكتىڭ مالىمەتىنشە، وليمپيادالىق تسيكلدى ونىڭ مىسالىندا تالداي وتىرىپ، جوعارى دارەجەلى سپورتشىنى قولداۋدىڭ بارلىق تەتىگى تولىق كولەمدە جۇمىس ىستەگەن.
«ماسەلەن، 2025 جىلى سپورتشى مەن ونىڭ كومانداسىنىڭ دايىندىعىن قامتاماسىز ەتۋگە باعىتتالعان جالپى قارجى كولەمى 263 394 581 تەڭگەنى قۇرادى. ونىڭ ىشىندە 19 وقۋ-جاتتىعۋ جيىنىنا (8-ءى قازاقستاندا، 11-ءى شەتەلدە) 47 ملن تەڭگە، ال 5 حالىقارالىق جارىسقا قاتىسۋعا 16 ملن تەڭگە ءبولىندى. 2025 جىلى سپورتشىنىڭ جالپى ەڭبەكاقىسى (قر تسم درس، فەدەراتسيا جانە اكىمدىك جەلىسى بويىنشا) 33 989 000 تەڭگەنى قۇرادى»، – دەلىنگەن حابارلامادا.
سپورتشىنىڭ جەكە باپكەرى الەكسەي ۋرمانوۆتىڭ 2025 جىلعى ەڭبەكاقىسى (قر تسم درس جانە فەدەراتسيا جەلىسى بويىنشا) 26 000 000 استام تەڭگە بولعان. حورەوگراف ي.ۆ.رەگينانىڭ 2025 جىلعى ەڭبەكاقىسى (قر تسم جانە فەدەراتسيا جەلىسى بويىنشا) 23 000 000 تەڭگەنى قۇراعان. قوسىمشا تۇردە جارىس باعدارلامالارىن قويۋ، ەكى كوستيۋم تىكتىرۋ جانە شىعارمالارعا اۆتورلىق قۇقىقتاردى ساتىپ الۋ شىعىندارى دا قارجىلاندىرىلعان. بۇعان دەيىن سپورتشى الەم چەمپيوناتى مەن ازيا ويىندارىنداعى جوعارى ناتيجەسى ءۇشىن 6 694 581 تەڭگە كولەمىندە بىرجولعى سىياقى السا، جاتتىقتىرۋشىلار شتابىنا قوسىمشا 1 506 040 تەڭگە تولەندى.
مينيسترلىك حابارلاۋىنشا، كوشباسشى سپورتشىلاردى دايارلاۋ مودەلى وقۋ-جاتتىعۋ جيىنىنان باستاپ، عىلىمي-مەديتسينالىق قامتاماسىز ەتۋ مەن ماتەريالدىق قولداۋعا دەيىنگى كەشەندى قاعيداتقا نەگىزدەلگەن. اتاۋلى قارجىلاندىرۋ تاجىريبەسى مەملەكەت تاراپىنان جۇيەلى ءتاسىل رەتىندە قالىپتاسىپ، وتاندىق سپورتشىلاردىڭ قىسقى سپورت تۇرلەرىندە الەمنىڭ ۇزدىكتەرىمەن تەڭ دارەجەدە باسەكەلەسۋىنە بارلىق قاجەتتى جاعداي جاسالعانىن كورسەتەدى.
ەسكە سالايىق، قىسقى وليمپيادا دا ميحايل شايدوروۆ مانەرلەپ سىرعاناۋدان چەمپيون اتانىپ، ەلگە 32 جىلدان كەيىن قىسقى جارىستىڭ التىنىن اكەلگەن ەدى. وسى جەڭىسى ءۇشىن ءانشى ديماش قۇدايبەرگەن وعان كولىك، ال وتاندىق قۇرىلىس كومپانياسى ءۇش بولمەلى پاتەر سىيلادى.
