جەزقازعان قالاسىندا بايداركا مەن كانوەدا ەسكەك ەسۋشىلەردى دايارلايتىن جاڭا سپورت مەكتەبى پايدالانۋعا بەرىلدى. زاماناۋي تالاپتارعا ساي سالىنعان قوس قاباتتى عيماراتتا سپورتشىلاردىڭ جان-جاقتى دايىندالۋىنا بارلىق جاعداي قاراستىرىلعان. مۇندا تەوريالىق ساباقتارعا ارنالعان وقۋ سىنىپتارى، جاتتىعۋ زالدارى، جۋىنۋ جانە كيىم اۋىستىرۋ بولمەلەرى جابدىقتالعان.
وسى ۋاقىتقا دەيىن ءوڭىر سپورتشىلارى اتالعان سپورت تۇرىمەن تەك جاز مەزگىلىندە عانا شۇعىلدانسا، ەندى جاڭا نىساننىڭ اشىلۋىمەن جىل بويى جاتتىعۋ جاساۋعا مۇمكىندىك تۋدى. سونىمەن قاتار قىس مەزگىلىندە ەسكەك ەسۋشىلەردىڭ شاڭعى سپورتى ارقىلى جالپى دەنە دايىندىعىن جەتىلدىرۋىنە دە قولايلى جاعداي جاسالىپ وتىر. بۇل – سپورتشىلاردىڭ كاسىبي شەبەرلىگىن ارتتىرىپ، رەسپۋبليكالىق جانە حالىقارالىق جارىستاردا جوعارى ناتيجەگە قول جەتكىزۋىنە نەگىز بولماق.
اشىلۋ سالتاناتىندا ۇلىتاۋ وبلىسىنىڭ اكىمى داستان رىسپەكوۆ ەسكەك ەسۋ سپورتىنىڭ ءوڭىر ءۇشىن تاريحي ماڭىزى زور ەكەنىن اتاپ ءوتتى.
«ەسكەك ەسۋ سپورتى دا ايماعىمىزدا وزىندىك ورنى بار، تالاي دارىندى سپورتشىلاردى تۇلەتكەن سالا. بۇگىنگى جاڭا مەكتەپ – سول يگى ءداستۇردىڭ جالعاسى. ءبىز جاس سپورتشىلاردىڭ كاسىبي تۇرعىدا وسۋىنە، حالىقارالىق ارەنالاردا ەل نامىسىن قورعاۋىنا بارلىق قاجەتتى جاعدايدى جاساي بەرەمىز»، – دەدى ءوڭىر باسشىسى.
بۇگىندە ۇلىتاۋ وبلىسىندا بۇگىنگى تاڭدا 9 جاڭا سپورت كەشەنى پايدالانۋعا بەرىلىپ، سپورتتىق ينفراقۇرىلىم 25 پايىزعا جاڭارتىلدى. بۇل – بۇقارالىق سپورتتى دامىتۋعا جانە سالاۋاتتى ءومىر سالتىن قالىپتاستىرۋعا باعىتتالعان جۇيەلى جۇمىستىڭ ناتيجەسى.
ايتا كەتەيىك، جاڭا نىسان بوي كوتەرگەن جەزقازعان قالاسىنىڭ باتىس اۋدانىندا سول كۇنى قازاقستان رەسپۋبليكاسىنىڭ ۇلتتىق بانكى عيماراتى دا اشىلدى. بۇل – وبلىس ورتالىعىنداعى جاڭا اۋداننىڭ جۇيەلى ءارى قارقىندى دامىپ كەلە جاتقانىن ايقىن كورسەتەدى.
جالپى، قالانىڭ جاڭا بولىگى الداعى ۋاقىتتا ءوڭىر دامۋىنىڭ زاماناۋي كەلبەتىن ايقىندايتىن ماڭىزدى ورتالىققا اينالماق. بيىل ماۋسىم ايىندا مۇندا وقۋشىلار سارايىن اشۋ جوسپارلانىپ وتىر، سونداي-اق جاڭا ەمحانانىڭ قۇرىلىسى باستالادى دەپ كۇتىلۋدە. بۇل باستامالار تۇرعىنداردىڭ ءومىر ساپاسىن ارتتىرىپ، الەۋمەتتىك ينفراقۇرىلىمدى جاڭا دەڭگەيگە كوتەرۋگە باعىتتالعان.
