ۇلىتاۋ وبلىسى توتەنشە جاعدايلار دەپارتامەنتىنىڭ ماتەريالدىق-تەحنيكالىق بازاسى جاڭا زاماناۋي تەحنيكامەن تولىقتى. مينيسترلىك تاراپىنان بەرىلگەن مي-8امت ماركالى قۇتقارۋ تىكۇشاعى دەپارتامەنت بالانسىنا رەسمي تۇردە تاپسىرىلدى.
ءوڭىر باسشىسى داستان رىسپەكوۆ جاڭا اۋە كولىگىنىڭ تەحنيكالىق مۇمكىندىكتەرىمەن تانىسىپ، ونىڭ توتەنشە جاعدايلارمەن كۇرەستەگى ماڭىزدىلىعىن اتاپ ءوتتى.
2020 جىلى شىعارىلعان مي-8امت تىكۇشاعى ساعاتىنا 250 شاقىرىم جىلدامدىقپەن ۇشىپ، 4700 مەتر بيىكتىككە دەيىن كوتەرىلە الادى. بۇل تەحنيكا زاماناۋي تالاپتارعا ساي جابدىقتالعان جانە ازاماتتىق قورعاۋ سالاسىنداعى ۋاكىلەتتى ورگان مەن ونىڭ اۋماقتىق بولىمشەلەرىنىڭ جەكە قۇرامىن جانە جۇگىن تابيعي جانە تەحنوگەندىك سيپاتتاعى توتەنشە جاعدايلار ايماقتارىنا شۇعىل جەتكىزۋ، ءورت وشاقتارىن ءسوندىرۋ جانە پاترۋلدەۋ، ءورت سوندىرۋشىلەردى ءورت ايماقتارىنا جەتكىزۋ جانە دەسانتپەن ءتۇسىرۋ، ورمان القاپتارىن اۋەدەن باقىلاۋ جانە اەروفوتوتۇسىرىلىم جۇرگىزۋ، اۋىر حالدەگى ناۋقاستار مەن زارداپ شەككەندەردى جەدەل ەۆاكۋاتسيالاۋ، اۋە اپاتتارىنا ۇشىراعان اۋە كەمەلەرى مەن ولاردىڭ جولاۋشىلارىن، سونداي-اق توتەنشە جاعداي ايماقتارىنداعى حالىقتى ىزدەۋ جانە قۇتقارۋ مىندەتتەرىن اتقارۋعا قاۋقارلى.
جاڭا تىكۇشاقتىڭ پايدالانۋعا بەرىلۋى وڭىردەگى توتەنشە جاعدايلارعا جەدەل ارەكەت ەتۋ الەۋەتىن ەداۋىر ارتتىرىپ، حالىقتىڭ قاۋىپسىزدىگىن قامتاماسىز ەتۋ ىسىنە زور ۇلەس قوسپاق.
