2025 جىل جەزقازعان قالاسى ءۇشىن اباتتاندىرۋ جانە كوگالداندىرۋ جىلى بولدى. قالا اۋماعىندا ساياباقتار مەن قوعامدىق كەڭىستىكتەردى جاڭعىرتۋ، تۇرعىن ۇيلەردىڭ قاسبەتتەرىن جاقسارتۋ جانە ينفراقۇرىلىمدى دامىتۋ باعىتىندا اۋقىمدى جۇمىستار اتقارىلدى.
الاشاحان داڭعىلى بويىنداعى جاياۋ جۇرگىنشىلەر ايماعى اباتتاندىرىلدى. قالادا 31 جاڭا بالالار ويىن الاڭى ورناتىلىپ، 8 الاڭ قالپىنا كەلتىرىلدى. سونىمەن قاتار، 100 قوقىس كونتەينەر الاڭى اباتتاندىرىلىپ، 400 كونتەينەر اۋىستىرىلدى. اۋلاىشىلىك جارىقتاندىرۋدى جاقسارتۋ ماقساتىندا 105 كوشە شامى مەن جارىقتاندىرۋ تىرەكتەرى ورناتىلدى. «قازاقمىس» كورپوراتسياسىنىڭ قولداۋىمەن 40 كوپقاباتتى تۇرعىن ءۇيدىڭ قاسبەتى جاڭارتىلدى. مومىشۇلى كوشەسىندەگى ساياباقتى اباتتاندىرۋ جۇمىستارى اياقتالۋعا جاقىن.
قالانىڭ دامۋى جاڭا باتىس اۋدانىمەن جالعاسۋدا. باس جوسپارعا سايكەس بۇل اۋماقتا الەۋمەتتىك نىساندار مەن زاماناۋي تۇرعىن ءۇي كەشەندەرى سالىنادى. بولاشاقتا مۇندا 12 مىڭنان استام تۇرعىن ءومىر سۇرەدى دەپ كۇتىلۋدە.
ساۋلەتتىك كەلبەت پەن قالا قۇرىلىسى جوسپارلاۋ باعىتىندا باتىس اۋداندا ماگيسترالدىق جىلۋ، سۋ جانە كارىز جەلىلەرىنىڭ قۇرىلىسى جالعاسۋدا. سونىمەن قاتار، قالاداعى ءتورت اۋداننىڭ ەگجەي-تەگجەيلى جوسپارلاۋ جوبالارى ازىرلەنۋدە.
