موڭعوليانىڭ بۇرىنعى پرەزيدەنتى تساحياگين ەلباگدورج ۆلاديمير ءپۋتيننىڭ امەريكاندىق تەلەجۇرگىزۋشى تاكەر كارلسونعا بەرگەن سۇحباتىنا جاۋاپ بەردى، دەپ حابارلايدى “ادىرنا” ۇلتتىق پورتالى DW.com اقپارات اگەنتتىگىنە سىلتەمە جاساپ.
سۇحباتتا رەسەي پرەزيدەنتى پۋتين قازىرگى ۋكراينا تەرريتورياسىنىڭ كوپ بولىگى بۇرىن رەسەي يمپەرياسىنىڭ قۇرامىندا بولعانىن بىرنەشە رەت ەسكە سالعان بولاتىن.
ەلباگدورج دۇيسەنبى، 12 اقپاندا ح الەۋمەتتىك جەلىسىندە جاريالاعان كارتادا قازىرگى رەسەيدىڭ شەكاراسىنىڭ اۋماعى شىڭعىس حان يمپەرياسىنىڭ ءبىر بولىگى سياقتى كورسەتىلگەن.
ء"پۋتيننىڭ سۇحباتىنان كەيىن، مەن موڭعوليانىڭ تاريحي كارتاسىن تاپتىم. ۋايىمداماڭىز. ءبىز بەيبىت جانە ەركىن ۇلتپىز", - دەپ جازدى بۇرىنعى موڭعول پرەزيدەنتى رەسەيدىڭ ۋكرايناعا باسىپ كىرۋىن اقتايتىن رەسەيلىك ۇگىت-ناسيحاتتىڭ نەگىزگى تەزيستەرىنىڭ ءبىرىن يرونيالاپ.
جالپى، موڭعوليا ماسكەۋمەن تىعىز ەكونوميكالىق جانە ساياسي بايلانىستاردى ساقتايدى، ەلدە مەكتەپتە ورىس ءتىلى وقىتىلادى. رەسەيدىڭ ۋكرايناعا قارسى سوعىسىندا ەل رەسمي تۇردە بەيتاراپ پوزيتسيانى ۇستانادى. سونىمەن بىرگە، 2022 جىلى ەلباگدورج ءپۋتيندى شاپقىنشىلىقتى توقتاتۋعا شاقىردى. ول ءوزى موڭعوليا پرەزيدەنتى قىزمەتىن 2009 جىلدان 2017 جىلعا دەيىن اتقاردى.
“ادىرنا” ۇلتتىق پورتالى
