بۇگىن، 29 قازاندا موڭعوليا مەملەكەتتىك سارايىنىڭ الدىنداعى ەلوردانىڭ ورتالىق الاڭىندا ۇلان-باتىرعا مەملەكەتتىك ساپارمەن بارعان قازاقستان پرەزيدەنتى قاسىم-جومارت كەمەلۇلى توقاەۆتى رەسمي قارسى الۋ ءراسىمى ءوتتى، دەپ حابارلايدى “ادىرنا” ۇلتتىق پورتالى.
موڭعوليا پرەزيدەنتى ۋحنااگين حۋرەلسۋح قولباسشى د.ءسۇحبااتار الاڭىندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتى رەسمي تۇردە قارسى الدى.
مontsame اقپاراتتىق پورتالىنىڭ حابارلاۋىنشا، مەملەكەتتىك قۇرمەتتى قاراۋىل قولباسشىسىنىڭ راپورتىنان كەيىن ەكى ەلدىڭ مەملەكەتتىك ءانۇراندارى شىرقالدى. ەكى مەملەكەت باسشىلارى مەملەكەتتىك سالتاناتتى اق اسكەري تۋعا تاعزىم ەتتى، ودان كەيىن پرەزيدەنت قاسىم-جومارت توقاەۆ قۇرمەتتى قاراۋىل ساپىن قارسى الدى.
سونداي-اق ۋحنااگين حۋرەلسۋح پەن قاسىم-جومارت توقاەۆتى قارسى الۋ راسىمىنە كەلگەن موڭعوليا مەن قازاقستان رەسپۋبليكاسىنىڭ رەسمي وكىلدەرى، موڭعولياداعى ديپلوماتيالىق ميسسيالاردىڭ باسشىلارى جانە حالىقارالىق ۇيىمداردىڭ تۇراقتى وكىلدەرى قارسى الدى.
رەسمي قارسى الۋ راسىمىنەن كەيىن ەكى ەلدىڭ پرەزيدەنتتەرى ۇلى شىڭعىس حان ەسكەرتكىشىنە تاعزىم ەتىپ، موڭعوليا مەملەكەتتىك سارايىنا بەت الدى، وندا قاسىم-جومارت توقاەۆ قۇرمەتتى قوناقتار كىتابىنا جازبا قالدىردى.
مەملەكەتتىك ساپار اياسىندا موڭعوليا پرەزيدەنتى ۋحنااگين حۋرەلسۋح پەن قازاقستان پرەزيدەنتى قاسىم-جومارت توقاەۆ شاعىن قۇرامدا كەلىسسوز جۇرگىزدى.
قاسىم-جومارت توقاەۆ قوناقجايلىق كورسەتكەنى ءۇشىن ۋحنااگين حۋرەلسۋحكە ريزاشىلىق ءبىلدىرىپ، ءوزىنىڭ مەملەكەت باسشىسى رەتىندەگى موڭعولياعا العاشقى ساپارىنا ەرەكشە ءمان بەرەتىنىن اتاپ ءوتتى.
مەملەكەت باسشىسىنىڭ ايتۋىنشا، موڭعوليا – قازاقستاننىڭ ماڭىزدى سەرىكتەستەرىنىڭ ءبىرى. قوس حالىقتىڭ ءداستۇرى مەن مادەني-تاريحي تامىرى ورتاق.
«قۇرمەتتى پرەزيدەنت، بۇگىن ءسىزدىڭ شاقىرۋىڭىز بويىنشا موڭعولياعا مەملەكەتتىك ساپارمەن كەلىپ وتىرمىن. ماعان جانە قازاقستان دەلەگاتسياسىنا، بۇل — ۇلكەن قۇرمەت. بۇگىن ءبىز ەكىجاقتى ماڭىزدى قۇجاتتارعا، سونىڭ ىشىندە قازاقستان مەن موڭعوليا اراسىندا ستراتەگيالىق سەرىكتەستىك ورناتۋ تۋرالى دەكلاراتسياعا قول قويامىز. بۇل قادام ەلدەرىمىزدىڭ بارلىق دەڭگەيدەگى ىقپالداستىعىن جانداندىرۋعا ارقاۋ بولماق. سونداي-اق قوس حالىقتىڭ يگىلىگى ءۇشىن جاڭا مۇمكىندىكتەرگە جول اشادى دەپ سەنەمىن»، — دەدى قاسىم-جومارت توقاەۆ.
ءوز كەزىندە ۋحنااگين حۋرەلسۋح قازاقستان پرەزيدەنتىنىڭ موڭعولياعا مەملەكەتتىك ساپارى ەكىجاقتى ىنتىماقتاستىقتى مۇلدەم جاڭا دەڭگەيگە كوتەرەتىنىنە سەنىم ءبىلدىردى.
«شىن مانىندە، ەكى ەل اراسىندا ديپلوماتيالىق قارىم-قاتىناس ورناعانىنا 30 جىلدان استى. قازاقستان پرەزيدەنتىنىڭ موڭعولياعا مەملەكەتتىك ساپارى سوڭعى رەت وسىدان 16 جىل بۇرىن بولعان ەدى. ەلىمىز ءسىزدىڭ بۇگىنگى ساپارىڭىزدى ەكىجاقتى ىنتىماقتاستىقتىڭ تاياۋ جىلدارداعى پەرسپەكتيۆتى باعىتتارىن ايقىندايتىن مەزەت رەتىندە قاراستىرادى. بۇل ساپار ەكى ەلدىڭ قارىم-قاتىناسىن ستراتەگيالىق سەرىكتەستىك دەڭگەيگە شىعارۋ تۇرعىسىنان وتە ماڭىزدى»، – دەدى موڭعوليا پرەزيدەنتى.
مازمۇندى اڭگىمەلەسۋ بارىسىندا مەملەكەتتەر باسشىلارى ساياسي، ساۋدا-ەكونوميكالىق جانە ينۆەستيتسيالىق بايلانىستاردى دامىتۋ پەرسپەكتيۆاسىنا ايرىقشا ءمان بەردى. سونداي-اق اۋىل شارۋاشىلىعى، تاۋ-كەن جانە مەتاللۋرگيا كەشەنى، ەنەرگەتيكا، كولىك-لوگيستيكا، قارجى سالالارىنداعى قارىم-قاتىناس ماسەلەلەرى تالقىلاندى.
كەزدەسۋ سوڭىندا موڭعوليا پرەزيدەنتى مەملەكەت باسشىسىنا 60 مىڭنان استام ءسوز ەنگەن قازاق-موڭعول سوزدىگىن سىيعا تارتتى.
ايتا كەتەيىك، بۇل — قازاقستاننىڭ ەكىنشى پرەزيدەنتىنىڭ موڭعولياعا تۇڭعىش ساپارى.
ەسكە سالساق، قاسىم-جومارت توقاەۆتى مەملەكەتتىك ساپارمەن كەلۋگە موڭعوليا پرەزيدەنتى ارنايى شاقىرعان ەدى.
