حالقىمىزدىڭ حح عاسىردا باسىنان وتكىزگەن ەڭ اۋىر كەزەڭدەرىنىڭ ءبىرى — ەكىنشى دۇنيەجۇزىلىك سوعىس. تاريحي دەرەكتەر 1,2 ميلليون قازاقستاندىقتىڭ قان مايدانعا اتتانىپ، ونىڭ 600 مىڭى سۇراپىل سوعىستان ورالماعانىن كورسەتەدى.
قاھارمان حالقىمىزدىڭ جاھانعا ۋىن شاشقان ءفاشيزمدى تالقانداپ، كۇللى ادامزاتتى وزبىرلىقتان امان ساقتاپ قالعان ۇلى جەڭىسىنە بۇگىن 80 جىل تولىپ وتىر. ەلىمىزدىڭ تۇپكىر-تۇپكىرىندە وسىناۋ تاريحي وقيعا كەڭىنەن اتالىپ ءوتىپ جاتىر.
اتاپ ايتقاندا، بۇگىن شىمكەنت قالاسىنداعى «داڭق» مەموريالدىق كەشەنىندە ۇلى وتان سوعىسىنداعى جەڭىستىڭ 80 جىلدىعىنا ارنالعان «ۇلى جەڭىس – ۇرپاققا امانات» اتتى مەرەكەلىك ءىس-شارا ءوتتى.
سالتاناتتى ءىس-شاراعا جينالعان كوپشىلىك، ەڭ الدىمەن، قازاقستان رەسپۋبليكاسىنىڭ مەملەكەتتىك گيمنىن شىرقادى. ەلىمىزدىڭ ءانۇرانىن ۇلتتىق ۇلاننىڭ شىمكەنت قالاسىندا ورنالاسقان 6506 اسكەري ءبولىمىنىڭ وركەستورى باستاپ ورىندادى.
مۇنان كەيىن سالتاناتتى جيىنعا قاتىسۋشىلار ۇلى وتان سوعىسىندا قازا تاپقانداردى ءبىر مينۋت ۇنسىزدىكپەن ەسكە الدى.
سونداي-اق، قالا اكىمى عابيت سىزدىقبەكوۆ پەن زيالى قاۋىم وكىلدەرى «جۇلدىز» جانە «ۇشاق» ەسكەرتكىشتەرىنە گۇل شوقتارىن قويىپ، وتان ءۇشىن وت كەشكەن اتالار رۋحىنا قۇرمەت كورسەتتى. گۇل شوقتارىن قويۋ راسىمىنە قاتىسقانداردىڭ اراسىندا ۇلى وتان سوعىسىنىڭ ارداگەرى، بۇگىندە 100 جاسقا كەلىپ وتىرعان قادىرلى قاريا مۇراتالى تولەپبەرگەنۇلى دا بار.
قوناقتار مەموريالدى كەشەن اۋماعىندا ۇيىمداستىرىلعان مايدان دالاسىنداعى جاۋىنگەرلەردىڭ ومىرىنەن سىر شەرتەتىن تەاترلاندىرىلعان كورىنىستى تاماشالادى. سونىمەن قاتار، ءىس –شارا شىمكەنت قالاسىنىڭ ونەرپازدارىنىڭ قاتىسۋىمەن «ۇلى جەڭىس – ۇرپاققا امانات» اتتى پاتريوتتىق كونتسەرتتىك باعدارلاماسىمەن جالعاسىپ جاتىر.
اتالعان ءىس-شارا — ۇلى وتان سوعىسىنداعى جەڭىستىڭ 80 جىلدىعىنا ارنالعان جانە جاس ۇرپاقتى وتانسۇيگىشتىككە تاربيەلەۋ، تاريحتى ۇلىقتاۋ جانە جاۋىنگەرلەردىڭ ەرلىگىنە تاعزىم ەتۋ ماقساتىندا ۇيىمداستىرىلعانىن ايتا كەتۋ كەرەك.
