سولتۇستىك قازاقستان وبلىسىندا سۋ دەڭگەيىنىڭ كۇرت كوتەرىلۋى شەكتى دەڭگەيدەن جوعارى بولادى دەپ كۇتىلۋدە، دەپ حابارلايدى “ادىرنا” ۇلتتىق پورتالى پرەمەر-ءمينيستردىڭ ءباسپاسوز قىزمەتىنە سىلتەپ.
«بۇگىن مەملەكەت باسشىسىنىڭ تاپسىرماسىمەن قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى رومان سكليار سۋ تاسقىنىنا قارسى كۇرەس جۇمىستارىن رەتتەۋ ءۇشىن سولتۇستىك قازاقستان وبلىسىنا باردى. ول وبلىس اكىمى عاۋەز نۇرمۇحامبەتوۆ پەن مەملەكەتتىك مەكەمە باسشىلارىنىڭ قاتىسۋىمەن وڭىردەگى سۋ تاسقىنى جاعدايى بويىنشا جەدەل كەڭەس وتكىزدى. سۋ تاسقىنىنىڭ اعىمداعى جاعدايى تۋرالى سولتۇستىك قازاقستان وبلىسى توتەنشە جاعدايلار دەپارتامەنتىنىڭ باسشىسى ەرىك سارىباەۆ، «قازگيدرومەت» سقوف ديرەكتورى قىمبات مەرعالىموۆا، «قازاۆتوجول» ۇك اق فيليالىنىڭ ديرەكتورى اقىلبەك قابىلدين باياندادى. وبلىستا كۇردەلى سۋ تاسقىنى جاعدايى قالىپتاسقان. سۋ دەڭگەيىنىڭ كريتيكالىق دەڭگەيدەن جوعارى كۇرت كوتەرىلۋى كۇتىلۋدە. ءساۋىردىڭ 5-ىنەن باستاپ سەرگەەۆ سۋ قويماسىنىڭ توبەسىنەن سۋ تاسىپ جاتىر. پەتروپاۆل قالاسىنىڭ ماڭىندا العاشقى سۋ تاسۋلارى التى كۇننەن كەيىن، ال سۋ تاسقىنىنىڭ شارىقتاۋ شەگى ءساۋىر ايىنىڭ سوڭىندا بولادى دەپ كۇتىلۋدە»، - دەلىنگەن سەنبىدەگى حاباردا.
سكليار سۋ تاسقىنىنىڭ قاۋىپتى جاعدايىنان ساقتانۋ ءۇشىن بارلىق كۇش-جىگەردى جۇمساۋ كەرەكتىگىن اتاپ ءوتتى. اتاپ ايتقاندا، سۋ تاسقىنىنان زارداپ شەككەن ازاماتتارعا بارلىق قاجەتتى كومەك كورسەتۋ بويىنشا كەشەندى شارالاردى قولعا الۋ قاجەت. كومەكتىڭ تەز ارادا جانە قاعازباستىلىقسىز كورسەتىلگەنى ماڭىزدى.
«كەزدەسۋ قورىتىندىسى بويىنشا پرەمەر-ءمينيستردىڭ ءبىرىنشى ورىنباسارى وبلىس باسشىلىعىنا حالىقتى ەۆاكۋاتسيالاۋ پۋنكتتەرىن دايىنداۋدى، ازىق-تۇلىك پەن ءدارى-دارمەكپەن قامتاماسىز ەتۋدى، سۋ باسۋ قاۋپى تونگەن كەزدەگى ءوزىن-ءوزى ۇستاۋ ەرەجەلەرى بويىنشا تۇرعىندار اراسىندا ءتۇسىندىرۋ جۇمىستارىن جالعاستىرۋدى، قاپتاردى ينەرتتى ماتەريالمەن تولتىرۋ، ولاردى ءبىر مەزگىلدە سۋ باسۋ قاۋپى بار جەرلەردە شوعىرلاندىرۋ، ەگىستىكتەردە ەرىگەن سۋدىڭ جينالۋىن تۇراقتى باقىلاۋدى جۇزەگە اسىرۋ، ىقتيمال سۋ تاسقىنىن جويۋ ءۇشىن كۇشتەر مەن قۇرالداردىڭ تاۋلىك بويى دايىندىعىن قامتاماسىز ەتۋ، سەرگەەۆسكي، چاگلينسكي جانە سەلەتينسكي سۋ قويمالارىنان سۋدىڭ اعۋىن تاۋلىك بويى باقىلاۋ تاپسىرىلدى»، - دەلىنگەن حابارلامادا.
