قازاقستان 2025 جىلى بەنزيننىڭ بولشەك باعاسىنىڭ ءوسۋى بويىنشا ەۋرازيالىق ەكونوميكالىق وداق ەلدەرى اراسىندا ءبىرىنشى ورىن الدى. بۇل تۋرالى ەۋرازيالىق ەكونوميكالىق كوميسسيا دەرەكتەرىنە سۇيەنگەن Orda.kz جازدى، دەپ حابارلايدى "ادىرنا".
قاڭتار–جەلتوقسان ارالىعىندا جانارماي باعاسى جانارماي قۇيۋ بەكەتتەرىندە 15,7%-عا وسكەن. ەكىنشى ورىندا – قىرعىزستان (15,1%), ءۇشىنشى ورىندا – رەسەي (10,8%). بەلارۋستە باعا 6,7%-عا ءوستى، ال ارمەنيادا كەرىسىنشە 0,8%-عا تومەندەدى. ەاەو بويىنشا ورتاشا ءوسىم 11,1% بولدى.
ايلىق كورسەتكىش بويىنشا دا (جەلتوقسان قاراشامەن سالىستىرعاندا) قازاقستاندا بەنزين باعاسى 0,4%-عا قىمباتتاپ، بۇل دا وداقتاعى ەڭ جوعارى ناتيجە سانالدى.
ديزەل وتىنى ءبىر جىلدا 14,1%-عا قىمباتتاپ، بۇل كورسەتكىش تە مۇشە ەلدەر اراسىندا ەڭ جوعارى بولدى. ودان كەيىن قىرعىزستان (11,1%), رەسەي (8,3%), بەلارۋس (6,6%) جانە ارمەنيا (–0,9%). ەاەو بويىنشا ورتاشا ءوسىم 8,8%-دى قۇرادى.
قازاقستاننىڭ كوشباسشى بولۋىنا وتكەن جىلدىڭ قاڭتارىندا بەنزين مەن ديزەل باعاسىن ىرىقتاندىرۋ ىقپال ەتتى. سول كەزدە ۇكىمەت بولشەك باعالاردى رەتتەمەيتىنىن، بىراق ولاردىڭ كۇرت وسۋىنە جول بەرمەيتىنىن مالىمدەگەن.
قازان ايىندا تۇتىنۋشىلىق ينفلياتسيانىڭ جەدەلدەۋى اياسىندا ەنەرگەتيكا مينيسترلىگى جانارماي قۇيۋ بەكەتتەرىندەگى باعانى ودان ءارى كوتەرۋگە موراتوري ەنگىزدى. باستاپقىدا بۇل شەكتەۋ 2026 جىلدىڭ ناۋرىزىنىڭ سوڭىنا دەيىن جالعاسادى دەپ جوسپارلانعان، الايدا ۆيتسە-مينيستر قايىرحان تۇتقىشباەۆ اقپان ايىنىڭ ورتاسىندا ء«موراتوريدى الىپ تاستاۋ ماسەلەسى ازىرگە قاراستىرىلىپ جاتقان جوق، شەشىمدى ۇكىمەت قابىلدايدى» دەگەن بولاتىن.
ەلەكتر ەنەرگياسىنىڭ قىمباتتاۋى جاعىنان قىرعىزستان (20,9%) ءبىرىنشى ورىندا. ەكىنشى ورىندا - رەسەي (13,1%), ءۇشىنشى ورىندا - بەلارۋس (11,9%), ال قازاقستان - ءتورتىنشى ورىندا (8%). ارمەنيادا ءوسىم 0,1% بولدى، جالپى ەاەو بويىنشا – 12,6%.
سونىمەن قاتار دوللارمەن ەسەپتەگەندە قازاقستانداعى بەنزين باعاسى ەاەو ىشىندە ەڭ تومەن دەڭگەيدە قالىپ وتىر: ءليترى $0,46. سالىستىرمالى تۇردە رەسەيدە – $0,82, قىرعىزستاندا – $0,87, بەلارۋستا – $0,88, ارمەنيادا – $1,38.
كەلەسى جىلدان باستاپ ەاەو اياسىندا مۇناي مەن مۇناي ونىمدەرىنىڭ بىرىڭعاي نارىعى ىسكە قوسىلۋى ءتيىس. بۇل مۇشە ەلدەردەگى باعا دەڭگەيىن تەڭەستىرۋگە اكەلۋى مۇمكىن. قازىرگى ۋاقىتتا قازاقستاننىڭ ەنەرگەتيكا مينيسترلىگى بەنزين مەن ديزەل ەكسپورتتاۋعا، سونىڭ ىشىندە ەاەو ەلدەرىنە دە، الدىن الا كەلىسىلگەن شاعىن كولەمدەردەن باسقا جاعدايدا، تىيىمدى ساقتاپ وتىر.
