ۆيتسە-مينيستر: قازاقستاندىق بيزنەسكە رەسەيدە شەكتەۋلەر كوپ

2215
Adyrna.kz Telegram

ساۋدا جانە ينتەگراتسيا مينيسترلىگىنىڭ القا وتىرىسىندا ۆيتسە-مينيستر جانەل كۇشىكوۆا ەاەو اياسىندا كەيبىر مەملەكەتتەر قازاقستان الدىنداعى مىندەتتەمەلەرىن ورىنداماي وتىرعانىن مالىمدەدى. بۇل تۋرالى  قازاقپاراتقا سىلتەمە جاساپ، "ادىرنا" ۇلتتىق پورتالى حابارلايدى.

«ەۋرازيالىق ەكونوميكالىق وداقتىڭ ورتاق نارىعىنىڭ الەۋەتىن تولىققاندى جۇزەگە اسىرۋعا جەكەلەگەن فاكتورلار كەدەرگى كەلتىرىپ تۇر. بىرىنشىدەن، ءوزارا ساۋداعا قويىلعان كەدەرگىلەر بار. وتاندىق تاۋارلاردىڭ ەكسپورتى ەڭ الدىمەن رەسەي نارىعىنا باعىتتالعان. سونىمەن بىرگە رەسەيلىك نارىقتاعى قازاقستاندىق بيزنەستىڭ جاندانۋى - سەرىكتەستەردىڭ شەكتەۋ شارالارىن ەنگىزۋىنە سەبەپ بولىپ وتىر. بۇگىنگى كۇنى دالەلدەنگەن 63 كەدەرگىنىڭ 54-ءى جويىلدى، ونىڭ 25-ءى رەسەيلىك تاراپتان قويىلعان. ونىڭ وزىندە بۇل ءتىزىم تولىق ەمەس»، - دەدى جانەل كۇشىكوۆا ساۋدا جانە ينتەگراتسيا مينيسترلىگىنىڭ القا وتىرىسىندا.

ونىڭ ايتۋىنشا، ۇكىمەت وسى كەدەرگىلەردىڭ ءبارىن انىقتاپ، ەەك الاڭىندا ولاردىڭ كۇشىن جويۋ ءۇشىن قاجەتتى شارالاردى قابىلداۋدا.

«ماسەلەن، وتكەن جىلى قازاقستاندىق بيزنەس ءۇشىن ەڭ جاندى دەگەن 8 كەدەرگىنىڭ كۇشى جويىلدى. ولاردىڭ جالپى سوماسى 100 ميلليون دوللاردى قۇرايدى. بيزنەسپەن كەرى بايلانىستى جولعا قويۋ ءۇشىن قوعامدىق قابىلداۋ قىزمەتى قۇرىلدى. ءبىزدىڭ بيزنەستىڭ جۇمىسىنا كەدەرگى كەلتىرەتىن تاعى 8 كەدەرگىنى الىپ تاستاۋ كەرەك»، - دەدى ول.

جانەل كۇشىكوۆا سونىمەن قاتار ەكونوميكالىق وداقتا سەرىكتەس مەملەكەتتەردىڭ كەيبىرى وزىنە العان مىندەتتەمەلەردى ورىنداماي جاتقانىن اتاپ ءوتتى.

«ەاەو تۋرالى كەلىسىمنىڭ نەگىزگى ەرەجەلەرى جوسپارلانعان ۋاقىتتان قالىپ بارادى. ءتىپتى جەكەلەگەن ەرەجەلەر مۇلدە شەت قالعان. كەيبىر كەلىسىمدەردىڭ كۇشىنە ەنۋ مەرزىمى ۇزارىپ كەتتى. مەملەكەتتىك ساتىپ الۋ سالاسىنداعى ۇلتتىق رەجيم تولىعىمەن ورىندالمايدى. ەاەو-داعى بەلگىلى سەرىكتەستەر ايماقتىق سەرتيفيكاتتاۋ تۇرىندە قوسىمشا تالاپتاردى بەلگىلەپ قويعان. بانك كەپىلدىكتەرى مەن ەسق-نى تانۋ ءتارتىبى مۇلدە جوق. ەاەو-عا مۇشە مەملەكەتتەردىڭ ىشكى شەكارالارىندا باقىلاۋدىڭ بارلىق ءتۇرىنىڭ جويىلعانىنا قاراماستان، ءىس جۇزىندە باقىلاۋدىڭ جاڭا تۇرلەرى پايدا بولا باستادى. وسىلايشا، رەسەي فەدەراتسياسىندا ۆەتەريناريالىق-سانيتارلىق باقىلاۋ دەگەن شىقتى. ال فەدەرالدى كەدەن قىزمەتىنىڭ ءموبيلدى توپتارى ءىس جۇزىندە كەدەندىك باقىلاۋدى جۇزەگە اسىرادى. ەاەو-نىڭ اقپاراتتىق ينتەگراتسيالانعان جۇيەسى جۇمىس ىستەۋدەن قالدى. جۋىق ارادا وسى ماسەلەلەردى كوتەرەمىز»، - دەدى ول.

جانەل كۇشىكوۆا ۇشىنشىدەن ەكونوميكالىق وداققا مۇشە مەملەكەتتەرمەن كووپەراتسيا دەڭگەيى مۇلدە تومەن ەكەنىن العا تارتتى.

«وكىنىشكە قاراي، ەاەو-عا مۇشە مەملەكەتتەر ءبىر-بىرىنە تەڭ سەرىكتەس ەمەس، باسەكەلەس رەتىندە قارايدى. وسى باعىتتاعى جۇمىستى كۇشەيتۋ قاجەتتىگىن پرەمەر-مينيستر 5 اقپانداعى ەۋرازيالىق ۇكىمەتارالىق كەڭەستىڭ وتىرىسى بارىسىندا دا اتاپ ءوتتى. ءۇشىنشى ەلدەرمەن ساۋدا كەلىسىمدەرىنىڭ الەۋەتىن بارىنشا ارتتىرۋعا مۇمكىندىك بەرەتىن ىنتىماقتاستىقتى جولعا قويۋ كەرەك دەپ سانايمىز»، - دەدى ول.

پىكىرلەر