ءماجىلىستىڭ بۇرىنعى سپيكەرى نۇرلان نىعماتۋليننىڭ ۇلدارى يەمدەنگەن «قازفوسفات» زاۋىتىنىڭ جۇمىسشىلارى ەرەۋىلگە شىقتى. ولار باسشىلىققا جالاقىنى ارتتىرۋدى مىندەتتەپ، 10 كۇن ىشىندە شەشىم شىعارۋ تالابىن قويدى، دەپ حابارلايدى "ادىرنا" ۇلتتىق پورتالى.
13 ءساۋىر كۇنى جامبىل وبلىسى اۋماعىندا ورنالاسقان «قازفوسفات» زاۋىتىنىڭ جاڭاتاس قالاسىنداعى فيليالى – «قاراتاۋ» تاۋ-كەن وڭدەۋ كەشەنىنىڭ ءجۇز ەلۋگە جۋىق جۇمىسشىسى كوشەگە ەرەۋىلگە شىقتى. جەلىگە تاراعان بەينەجازبالارعا قاراعاندا، جۇمىسشىلار ەڭبەك جاعدايىن جاقسارتۋ جانە جالاقىنى كوتەرۋدى تالاپ ەتكەن. جۇمىسشىلار اياق استىنان باس كوتەرىپ، قازىرگى باعانىڭ قۇلدىراۋىنا بايلانىستى 10 پايىز تومەن جالاقى الاتىندارىن ايتىپ شاعىمدانعان.
https://www.youtube.com/watch?time_continue=1&v=yJcYkZSaaNU&embeds_euri=https%3A%2F%2Forda.kz%2Ftrudovoj-konflikt-chego-hotyat-rabotniki-kazfosfata-v-zhanatase%2F&source_ve_path=MjM4NTE&feature=emb_title
جالاقى مولشەرى ينفلياتسيا سالدارىنان 20 000 تەڭگەگە "ازايىپ وتىر". ال باسشىلىق جوسپاردى تولىق ورىندامادىڭدار دەپ ەڭبەككەرلەردىڭ ءوزىن ايىپتاعان. مۇنداي بۇلعاققا توزبەگەن جۇمىسشىلار جۇمىس ورىندارىن تاستاپ شىعىپ، شەندى-شەكپەندىلەرمەن بەتپە-بەت سويلەسۋدى ۇيعارىپتى.
Orda.kz-ءتىڭ جازۋىنشا، جامبىل وبلىسى اكىمدىگى جۇمىسكەرلەردىڭ 7 تالاپتى العا تارتىپ وتىرعاندارىن ايتقان. ال جۋرناليست تالاپ ءتىزىمىنىڭ توعىز بولعانىن باياندادى.
سونىمەن قاتار، شەرۋلەتكەن جۇمىسشىلار باسشىلىقتىڭ بۇقپانداي شەشىمدەرىمەن كەلىسپەيدىندىگىن دە جەتكىزدى. ولاردىڭ ايتار ءۋاجى مىنانداي:
- كادرلىق «بيزنەستى» توقتاتۋلارىن باسشىلىقتان سۇرادىق. بىزدە ەشقانداي ساياسي تالاپ جوق. ساياسات بىزگە كەرەك ەمەس. ايلىق جالاقىمىز، جۇمىس جاعدايىمىز جاقسارسىن. سودان كەيىن وتكەندە جۇمىسشىلاردى 50 پايىز جەرگىلىكتى حالىقتان الامىز دەگەن. ەكىنشىدەن، ينفلياتسيانى ۇكىمەت قانشا ايتادى – سونى ءبىز قوسامىز دەگەن. وسى ۋاقىتقا دەيىن قوسىلعان جوق. ءبىز ارتىق ەشتەڭە تالاپ ەتىپ وتىرعان جوقپىز. بۇگىن بەنزين قىمباتتادى. 21 پايىزدىق ينفلياتسيالىق ايىرمانى ايلىققا قوسسىن، - دەيدى جۇمىسشىلاردىڭ ءبىرى.
جۇمىسشىلاردىڭ تاعى ءبىرى مۇنىڭ بەيبىت ميتينگ ەكەنىنە سەندىردى. باسشىلار تاراپىنان ەشقانداي شەشىم جوق ەكەنىن دە العا تارتتى.
- الدىنداعىداي قۇرعاق ۋادە، - دەيدى ول.
- يۆەستور كەلگەننەن كەيىن قارجى قۇيامىن دەپ كەلەدى. دۇرىس پا؟ بۇل جەرگە توناۋعا، ۇرلاۋعا كەلگەن سياقتى، ىستەپ تۇرعان فابريكانى توناپ تاستادى. سونىڭ ءبارى توقتاتىلسىن! مىنا جەردەگى «گالەرەيا» تولىعىمەن كەسىلىپ كەتتى، - دەيدى ءۇشىنشى ەڭبەككەر.
وسى وقيعادان سوڭ پارلامەنت ءماجىلىس دەپۋتاتى، گۇلدارا نۇرىموۆا جۇمىسشىلاردىڭ تالاپ-تىلەگىن تىڭداۋ ءۇشىن شۇعىل تۇردە اۋليەاتا وڭىرىنە جۇمىس ساپارىمەن شىعاتىندىعىن حابارلادى.
قۇرمەتتى جەرلەستەر! جاڭاتاستاعى جاعداي بويىنشا جۇمىسشىلاردىڭ تالاپ-تىلەگىن تىڭداۋ – مىندەتىم. سول ءۇشىن سارىسۋ اۋدانىنا جولعا شىعامىن. تاڭەرتەڭ جەدەل تۇردە استانادان ۇشاتىن بولامىن، - دەپ جازدى ول ءوزىنىڭ Facebook الەۋمەتتىك جەلىسىندەگى جەكە پاراقشاسىنا.
ال جامبىل وبلىسى اكىمدىگىنىڭ ەڭبەك ينسپەكتسياسى باسقارماسى سارىسۋداعى «قازفوسفات» جۇمىسشىلارىنىڭ نارازىلىققا شىققانىنا قاتىستى تۇسىنىكتەمە بەردى.
ساعات 12:30-دا جامبىل وبلىسىنىڭ سارىسۋ اۋدانىندا «قاراتاۋ» تاۋ-كەن وڭدەۋ كەشەنىنىڭ عيماراتىندا «قازفوسفات» جشس ديرەكتورىنىڭ ورىنباسارى ە.ساريەۆتىڭ، سونداي-اق اۋداندىق ءماسليحات دەپۋتاتتارىنىڭ قاتىسۋىمەن وسى كاسىپورىن قىزمەتكەرلەرىنىڭ (شامامەن 150 ادام) جينالىسى اياقتالدى، - دەپ حابارلادى باسقارما.
ەسكە سالا كەتەيىك، قازاقستاننىڭ بىرقاتار ايماعىندا جۇمىسشىلار جالاقى جانە كادرلىق شەشىمدەرگە بايلانىستى باس كوتەرە باستادى. "قازمۇنايگاز" جانە "وزەنمۇنايگازعا" قىزمەت كورسەتەتىن "بەرالى ماڭعىستاۋ Company" كاسىپورنىندا جۇمىس ىستەگەن مۇنايشىلار تەندەرگە بايلانىستى جۇمىستان قىسقارىپ قالعان. "قازمۇنايگاز" ولارعا جالاقىسىن ساقتاي وتىرىپ، كەزبي" جانە Ai-Bis كومپانيالارىنان جۇمىس ۇسىنعان. بىراق ولار بۇل ۇسىنىسقا كەلىسپەي، "توعىز ايدان سوڭ تاعى تەندەر ءوتىپ، تاعى دا جۇمىسسىز قالامىز، بىزگە تۇراقتى جۇمىس كەرەك" دەگەن تالاپ قويدى. بيلىك وكىلدەرى مەن مۇنايشىلاردىڭ اراسىنداعى تالاس-تارتىس ءالى جالعاسىپ جاتىر.
"ادىرنا" ۇلتتىق پورتالى
