شەتەلدە تۇراتىن تاجىك وپپوزيتسيالىق ۇيىمدارىنىڭ جەتەكشىلەرى اقش پرەزيدەنتى دونالد ترامپقا اشىق حات جولدادى، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
حاتتا ونىڭ تاجىكستان باسشىسى ەمومالي راحمونعا ساياسي تۇتقىنداردى بوساتۋعا ىقپال ەتۋى سۇرالعان.
ال حاتتىڭ ءماتىنى «تاجىكستاننىڭ رەفورمالار مەن دامۋى قوزعالىسىنىڭ» رەسمي سايتىندا جاريالاندى.
وپپوزيتسيا وكىلدەرى 6 قاراشادا ۆاشينگتوندا وتەتىن «ورتالىق ازيا — اقش» سامميتى اياسىنداعى ەكى ەل پرەزيدەنتتەرىنىڭ كەزدەسۋىندە ترامپ راحموندى حالىقارالىق قۇقىق پەن ادام قۇقىقتارى قاعيداتتارىنا نەگىزدەلگەن ديالوگ باستاۋعا جانە ساياسي تۇتقىنداردى بوساتۋعا شاقىرادى دەگەن ءۇمىت ءبىلدىردى.
حاتتا تاجىكستانداعى جۇيەلى ساياسي رەپرەسسيالار مەن ازاماتتىق ەركىندىكتەردىڭ شەكتەلۋى تۋرالى دا ايتىلعان. وپپوزيتسيانىڭ مالىمدەۋىنشە، ەلدە ءۇش ونجىلدىققا سوزىلعان اۆتوريتارلىق باسقارۋ جۇيەسى قوعامدى «قورقىنىش پەن باقىلاۋعا» تولى جاعدايعا جەتكىزگەن.
«مىڭداعان ادام ساياسي سەبەپتەرمەن قۋعىنعا ۇشىراپ، جۇزدەگەنى ازاپتاۋعا جانە ءماجبۇرلى جوعالۋعا تاپ بولدى. 8500-دەن استام ساياسي تۇتقىن تۇرمەدە وتىر، ولاردىڭ اراسىندا جۋرناليستەر، ادۆوكاتتار، قۇقىق قورعاۋشىلار، ءدىني كوشباسشىلار مەن بەلسەندىلەر بار. كەيبىرى — ايەلدەر مەن وپپوزيتسيونەرلەردىڭ تۋىستارى»، — دەلىنگەن حاتتا.
وپپوزيتسيا وكىلدەرى سونىمەن قاتار ترامپتىڭ بەلارۋستەگى ساياسي تۇتقىنداردى بوساتۋداعى ءرولىن اتاپ ءوتىپ، اقش-تىڭ ادام قۇقىقتارىن قورعاۋداعى جاھاندىق كوشباسشىلىعىنا ءۇمىت ارتتى.
اشىق حاتقا «تاجىكستاننىڭ رەفورمالار مەن دامۋى قوزعالىسىنىڭ» توراعاسى شاروفيددين گادوەۆ (امستەردام), «تاجىكستاننىڭ جاڭعىرۋ جاستارى» ۇيىمىنىڭ جەتەكشىسى ۋبايدۋللو سايدي (لوندون) جانە «تاجىكستان رەفورماتورلار قوزعالىسىنىڭ» باسشىسى مۋحامماديكبولي سادريددين (پاريج) قول قويعان.
