قازاقستاننىڭ سىرتقى ىستەر مينيسترلىگى اقش-تا مەديتسينالىق ساقتاندىرۋ باعدارلامالارىنا بايلانىستى الاياقتىق ءىسى بويىنشا ەكى قازاقستان ازاماتىنىڭ ۇستالعانىن راستادى، دەپ حابارلايدى "ادىرنا".
مينيسترلىك مالىمەتىنشە، قازاقستاندىق تاراپقا اقش قۇقىق قورعاۋ ورگاندارى قازاقستاننىڭ ەكى ازاماتىنىڭ ۇستالعانى تۋرالى حابارلاعان.
«سىرتقى ىستەر مينيسترلىگى ءسىزدىڭ وتىنىشىڭىزدە كورسەتىلگەن ازاماتتاردىڭ ۇستالعانى تۋرالى حاباردار. بۇل فاكت جونىندە قازاقستاندىق تاراپتى اقش قۇقىق قورعاۋ ورگاندارى حاباردار ەتتى. نيۋ-يوركتەگى قازاقستان رەسپۋبليكاسىنىڭ باس كونسۋلدىعى وسى ماسەلە بويىنشا امەريكالىق تاراپپەن تۇراقتى بايلانىستا»، - دەلىنگەن ۆەدومستۆونىڭ جاۋابىندا.
مينيسترلىكتە سونداي-اق ۇستالعان ازاماتتاردىڭ تۋىستارى بۇل ماسەلەگە قاتىستى قازاقستاننىڭ ديپلوماتيالىق وكىلدىكتەرىنە ازىرگە جۇگىنبەگەنى ناقتىلاندى.
بۇعان دەيىن چيكاگو قالاسىندا قازاقستاننىڭ ەكى ازاماتىنا اقش-تىڭ Medicare جانە Medigap مەديتسينالىق ساقتاندىرۋ باعدارلامالارىمەن بايلانىستى كوپدەڭگەيلى الاياقتىق سحەمالارىنا قاتىسى بار دەگەن ايىپ تاعىلعانى بەلگىلى بولعان.
اقش فەدەرالدىق پروكۋراتۋراسىنىڭ دەرەگىنشە، ءسوز جالعان مەديتسينالىق قۇرال-جابدىقتار مەن دياگنوستيكالىق قىزمەتتەرگە بەرىلگەن وتىنىمدەر ارقىلى 1 ميلليارد دوللاردان استام قارجى تۋرالى بولىپ وتىر.
ايىپتاۋ اكتىلەرىنىڭ بىرىندە قازاقستان ازاماتى ا. ا.-عا Medicare باعدارلاماسىنا قاتىستى الاياقتىقتان تۇسكەن قاراجاتتى زاڭداستىرۋ ماقساتىندا ءسوز بايلاسۋ ايىبى تاعىلعان.
ەكىنشى ءىس بويىنشا فەدەرالدىق پروكۋراتۋرا چيكاگو ماڭىندا تۇراتىن قازاقستاندىق ت. س.-تى مەديتسينالىق ساقتاندىرۋعا بايلانىستى باعدارلاما ارقىلى اقشا جىلىستاتۋ ماقساتىندا ءسوز بايلاسۋعا قاتىستى دەپ ايىپتاپ وتىر.
