قازاقستاندىق "ەۆرو وداق" لاقاپ اتىمەن تانىمال ترەۆەل-بلوگەر ەرحات قۇساينوۆ تۇركىمەنستاندا ۇستالدى، دەپ حابارلايدى "ادىرنا" ۇلتتىق پورتالى.
بۇل اقپاراتتى قر سىرتقى ىستەر مينيسترلىگى راستادى.
بلوگەردىڭ ينستاگرام پاراقشاسىنداعى مالىمەتكە سايكەس، ول ساياحاتتا جۇرگەن. "ەۆرو وداق" الماتىدان ابۋ-دابيگە اۆتوستوپپەن جەتۋدى جوسپارلاعان. سوڭعى جازباسى 17 قاراشادا جاريالانعان، وندا ەرحات سامارقاندتا تۇسكەن سۋرەتىن بولىسكەن. سول ۋاقىتتان بەرى ول بايلانىسقا شىقپاعان.
جازبانىڭ استىندا دوستارى مەن جازىلۋشىلارى الاڭداپ، بلوگەرگە "قايداسىڭ؟" دەگەن سۇراقتاردى جاۋدىرعان.
ەرحاتتىڭ ءبىر دوسى بۇگىن بلوگەردىڭ تابىلعانىن، بىراق "بايلانىسقا شىعۋ مۇمكىندىگى جوق ەكەنىن" ايتتى.
ء"بىز بىلەتىن جالعىز نارسە – ونىڭ امان جانە تۇركىمەنستاندا ەكەندىگى. مەملەكەتتىك ورگاندارمەن ماسەلەلەر تۋىنداعان بولۋى مۇمكىن، بالكىم ۆيزاسى نەمەسە قۇجاتتارى سەبەپ بولعان شىعار، ازىرگە تۇسىنىكسىز", – دەپ جازدى بلوگەر دياس بەيبىتۇلى ينستاگرام الەۋمەتتىك جەلىسىندە.
قر ءسىم-ءنىڭ رەسمي وكىلى ايبەك سمادياروۆ بلوگەردىڭ ۇستالۋىنا قاتىستى مالىمەتتەرمەن ءبولىستى.
"ول تۇركىمەن شەكاراشىلارى تاراپىنان وزبەكستان مەن تۇركىمەنستاننىڭ مەملەكەتتىك شەكاراسىن زاڭسىز كەسىپ وتكەنى ءۇشىن ۇستالدى. ءبىزدىڭ ەلشىلىك بۇل ماسەلە تۋرالى حاباردار، كونسۋل ۇستالعان ازاماتپەن كەزدەسۋ سۇرادى", – دەدى ول.
