پۋتين گازدى ەۋروپا مەن اقش-قا رۋبلمەن ساتپاق

2664
Adyrna.kz Telegram
فوتو:Kremlin.ru
فوتو:Kremlin.ru

رەسەي پرەزيدەنتى ۆلاديمير پۋتين كوگىلدىر وتىندى ەۋروپا ەلدەرى مەن اقش-قا رەسەي رۋبلىمەن ساتۋ تۋرالى شەشىمىن مالىمدەدى. بۇل تۋرالى ول ۇكىمەت مۇشەلەرىمەن كەزدەسۋدە ايتتى، دەپ حابارلايدى “ادىرنا” ۇلتتىق پورتالى.

"تاۋارلارىمىزدى ەۋروپالىق وداققا، اقش-قا جەتكىزىپ، تولەمدى دوللارمەن، ەۋرومەن جانە بىرقاتار باسقا ۆاليۋتامەن الۋدىڭ ماعىناسى جوق ەكەنى تۇسىنىكتى. سوندىقتان مەن قىسقا مەرزىمدە تولەمدى اۋدارۋ بويىنشا كەشەندى شارالاردى جۇزەگە اسىرۋدى ۇيعاردىم. كوگىلدىر وتىن دوستاستىق جوق ەلدەرگە رەسەي رۋبلىمەن جەتكىزىلەدى. ياعني، مۇنداي ەسەپتەۋلەردە بارلىق ۆاليۋتالاردى پايدالانۋدان باس تارتۋ كەرەك", - دەدى پۋتين.

ول رەسەي تابيعي گازدى بۇرىن جاسالعان كەلىسىمشارتتا بەكىتىلگەن كولەم مەن باعا بەلگىلەۋ قاعيداتتارىنا سايكەس جەتكىزەتىنىن اتاپ ءوتتى.

"كەيبىر ارىپتەستەردەن ايىرماشىلىعى، ءبىز سەنىمدى سەرىكتەس جانە جەتكىزۋشى رەتىندەگى بەدەلىمىزدى باعالايمىز. وزگەرىستەر تەك رەسەيلىك رۋبلگە اۋىستىرىلعان تولەم ۆاليۋتاسىنا عانا اسەر ەتەدى", - دەدى رەسەي پرەزيدەنتى.

ايتا كەتەيىك، اقش كونگرەسى وكىلدەر پالاتاسى 10 ناۋرىز كۇنى رەسەيدەن ەنەرگەتيكالىق رەسۋرستاردى، ياعني مۇناي مەن گازدى يمپورتتاۋعا تىيىم سالۋ تۋرالى زاڭ جوباسىن ماقۇلداعان بولاتىن.

ادىرنا” ۇلتتىق پورتالى

پىكىرلەر