مەملەكەت باسشىسى قاسىم-جومارت توقاەۆ ميحايل شايدوروۆتى قىسقى وليمپيادا ويىندارىنىڭ چەمپيونى اتانۋىمەن قۇتتىقتادى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردانىڭ ءباسپاسوز قىزمەتى حابارلادى.
پرەزيدەنت سپورتشىنىڭ وتاندىق سپورت تاريحىندا مانەرلەپ سىرعاناۋدان تۇڭعىش رەت التىن مەدال جەڭىپ الۋىن تاريحي ماڭىزى زور جەتىستىك رەتىندە باعالادى.
مەملەكەت باسشىسى ميحايل شايدوروۆقا جوعارى شەبەرلىگى مەن جەڭىسكە دەگەن جىگەرى ءۇشىن العىس ءبىلدىردى. سونداي-اق، سپورت جانكۇيەرلەرى مەن ەل ازاماتتارىنىڭ بۇل جەتىستىكتى ماقتان تۇتاتىنىن اتاپ ءوتتى.
پرەزيدەنت شەشىمىمەن ميحايل شايدوروۆ II دارەجەلى «بارىس» وردەنىمەن ماراپاتتالادى. سونىمەن قاتار جاتتىقتىرۋشىلارعا جانە ءتيىستى مينيسترلىككە اتقارعان جۇمىسى ءۇشىن ريزاشىلىق ءبىلدىرىلدى.
ايتا كەتەيىك، ميحايل شايدوروۆ 2026 جىلعى قىسقى وليمپيادا ويىندارى چەمپيونى اتاندى. وسى جەتىستىك ناتيجەسىندە قازاقستان ءانۇرانى قىسقى وليمپيادا تورىندە 32 جىلدان كەيىن قايتا شىرقالدى.
