فوتو: پاۆەل سەلەزنەۆ / تاسس
رەسەي كەلىسسوزدەر جۇرگىزۋگە دايىن، الايدا سول كەزەڭدە ۋكرايناداعى سوعىستى توقتاتپايدى. مۇنداي مالىمدەمەنى 12 قىركۇيەك رەسەي سىرتقى ىستەر ءمينيسترى سەرگەي لاۆروۆ جاسادى، دەپ حابارلايدى “ادىرنا”.
«ەگەر ۆلاديمير زەلەنسكي كەزدەسكىسى كەلسە، ماسكەۋگە كەلسىن»، – دەدى رەسەي ءمينيسترى نيۋ-دەليدە ءوتىپ جاتقان بريكس ءسامميتى بارىسىندا.
رەسەي پرەزيدەنتى ۆلاديمير پۋتين مەن ۋكراينا پرەزيدەنتى ۆلاديمير زەلەنسكي ماياميدە وتەتىن G20 ءسامميتى اياسىندا كەزدەسۋى «مۇمكىن ەمەس». بۇل تۋرالى ۆلاديمير ءپۋتيننىڭ ءباسپاسوز حاتشىسى دميتري پەسكوۆ نيۋ-دەليدە AFP اگەنتتىگىنە بەرگەن سۇحباتىندا ايتتى.
ول ۋكراينا باسشىسىنىڭ ۇسىنىسىن قابىلداماي، كەزدەسۋ تەك رەسەي استاناسىندا ءوتۋى مۇمكىن ەكەنىن ايتتى.
AFP ءتىلشىسى كرەمل كەلىسسوزدەر وتكىزۋگە باسقا ورىندى قاراستىرىپ جاتىر ما دەگەن سۇراق قويعان. پەسكوۆ بۇعان: «ونىمەن (زەلەنسكيمەن – رەد.) ماسكەۋدە كەزدەسۋگە دايىنبىز»، – دەپ جاۋاپ بەردى.
ۋكراينا پرەزيدەنتى ۆلاديمير زەلەنسكي 11 قىركۇيەكتە DW-گە بەرگەن سۇحباتىندا، ەگەر رەسەي پرەزيدەنتى G20 سامميتىنە قاتىساتىن بولسا، جەلتوقساندا ماياميدە ۆلاديمير پۋتينمەن كەزدەسۋگە دايىن ەكەنىن مالىمدەدى.
ء«يا، ارينە. ءبىز بارۋىمىز كەرەك. كەزدەسىپ، سويلەسىپ، شەشىم قابىلداۋىمىز قاجەت. ماسەلە سوزدە ەمەس. مەن وعان نە ايتاتىنىم نەمەسە ونىڭ ماعان نە ايتقىسى كەلەتىنى ماڭىزدى ەمەس. ماڭىزدىسى – ناتيجە. بار بولعانى وسى»، – دەدى زەلەنسكي.
ۆلاديمير زەلەنسكي مەن ۆلاديمير پۋتين رەسەيدىڭ ۋكرايناعا قارسى 2022 جىلعى اقپاندا باستاعان كەڭ اۋقىمدى سوعىسىنان بەرى جەكە كەزدەسكەن جوق.
رەسەي پرەزيدەنتى 2019 جىلدان بەرى G20 سامميتتەرىنە قاتىسقان ەمەس.
قىركۇيەك ايىنىڭ باسىندا اقش پرەزيدەنتى دونالد ترامپتىڭ ارنايى وكىلدەرى ستيۆ ۋيتكوفف پەن دجارەد كۋشنەر بەيبىت كەلىسسوزدەردى قايتا باستاۋ ماقساتىندا ماسكەۋ مەن كيەۆكە بارعان. كەيىن Financial Times باسىلىمى كەلىسسوز جۇرگىزۋشىلەردىڭ ماسكەۋ مەن كيەۆكە ساپارلارى ناقتى ناتيجەگە اكەلمەگەنىن جازدى.
