فوتو: GAVRIIL GRIGOROV | REUTERS / SCANPIX
سەنبى كۇنى كرەملدە رەسەي پرەزيدەنتى ۆلاديمير پۋتين مەن اقش پرەزيدەنتىنىڭ ارنايى وكىلدەرى ستيۆ ۋيتكوفف پەن دجارەد كۋشنەر اراسىندا ۋكرايناداعى سوعىستى توقتاتۋ ماسەلەسىنە قاتىستى كەلىسسوزدەر ءوتتى. كرەملدىڭ حابارلاۋىنشا، جابىق ەسىك جاعدايىندا وتكەن كەزدەسۋ ءۇش ساعاتتان استام ۋاقىتقا سوزىلعان. بۇل تۋرالى ۆۆس جازدى، دەپ حابارلايدى “ادىرنا”.
«كەزدەسۋ ءۇش ساعاتتان استام ۋاقىتقا، دالىرەك ايتقاندا 3 ساعات 10 مينۋتقا سوزىلدى»، – دەدى جۋرناليستەرگە ءپۋتيننىڭ كومەكشىسى يۋري ۋشاكوۆ.
ونىڭ ايتۋىنشا، كەزدەسۋ بارىسىندا ۋيتكوفف پەن كۋشنەر ۋكرايناداعى سوعىس قيمىلدارىن تەز ارادا توقتاتۋعا مۇددەلى ەكەنىن ءبىلدىرىپ، قاقتىعىستى رەتتەۋ جونىندەگى ءوز ۇسىنىستارىن ورتاعا سالعان.
«امەريكالىق وكىلدەر بۇل ساپارعا تىڭعىلىقتى دايىندالعان. ولار سوعىس قيمىلدارىن مۇمكىندىگىنشە تەز اياقتاۋعا دەگەن ءداستۇرلى قىزىعۋشىلىقتارىن ءبىلدىرىپ قانا قويماي، رەتتەۋدىڭ ىقتيمال جولدارىنا قاتىستى بىرقاتار ۇسىنىستارىن دا ايتتى»، – دەدى ۋشاكوۆ.
ۋشاكوۆتىڭ مالىمدەۋىنشە، پۋتين ترامپتىڭ وكىلدەرىنە رەسەيدىڭ ۋكراينادا الدىنا قويعان ماقساتتارىنا قول جەتكىزۋگە نيەتتى ەكەنىن جانە قاقتىعىستى رەتتەۋ ءۇشىن ونىڭ سەبەپتەرىن جويۋ قاجەت ەكەنىن ايتقان. رەسەي تاراپى امەريكا وكىلدەرىنە مايدان شەبىندەگى جاعدايعا قاتىستى ءوز باعاسىن دا ۇسىنعان.
ۋشاكوۆتىڭ سوزىنشە، اقش وكىلدەرى كيەۆتە وتەتىن الداعى كەلىسسوزدەر بارىسىندا ءپۋتيننىڭ باعالاۋلارىن ەسكەرۋگە ۋادە بەرگەن. بۇل كەزدەسۋلەردىڭ ماقساتى – سوعىستى توقتاتۋ جونىندەگى ۇزاق مەرزىمدى كەلىسىمگە قول جەتكىزۋدىڭ جولدارىن تابۋ.
ترامپتىڭ ارنايى وكىلدەرى كرەملدەگى كەزدەسۋدىڭ قورىتىندىسىنا ازىرگە تۇسىنىكتەمە بەرگەن جوق. سەنبى كۇنى كەشكە ولار ماسكەۋدەگى «ۆنۋكوۆو» اۋەجايىنان شىعىپ، ۋكرايناعا ۆلاديمير زەلەنسكيمەن كەلىسسوزدەر جۇرگىزۋ ءۇشىن اتتاندى.
جەكسەنبىگە قاراعان ءتۇنى الەمدىك اقپارات اگەنتتىكتەرى اق ءۇي وكىلىنىڭ قىسقاشا مالىمدەمەسىن تاراتتى. ونىڭ ايتۋىنشا، ماسكەۋدە ترامپتىڭ وكىلدەرى «تاياۋ اپتالاردا جاريالاناتىن الداعى ءىس-قيمىلداردىڭ ناقتى جوسپارلارىن تالقىلاعان جانە ۋكرايناداعى كەزدەسۋلەر دە ءدال وسىنداي ناتيجەلى بولادى دەپ ۇمىتتەنەدى».
