جەنەۆادا وتكەن جاھاندىق قارۋسىزدانۋ كونفەرەنتسياسىندا اقش مەملەكەتتىك حاتشىسىنىڭ قارۋ-جاراقتى باقىلاۋ جانە حالىقارالىق قاۋىپسىزدىك جونىندەگى ورىنباسارى توماس ديناننو قىتايدى 2020 جىلى جاسىرىن يادرولىق سىناقتار وتكىزدى دەپ ايىپتاپ، قىتايدى دا قامتيتىن ستراتەگيالىق قارۋ-جاراقتى باقىلاۋ جونىندەگى كەڭ اۋقىمدى كەلىسىم جاساۋعا شاقىردى. بۇل تۋرالى Reuters اگەنتتىگى جازدى، دەپ حابارلايدى "ادىرنا".
«مەن اقش ۇكىمەتىنىڭ قىتايدىڭ يادرولىق جارىلىس سىناقتارىن وتكىزگەنىن بىلەتىنىن مالىمدەي الامىن»، — دەدى ديناننو.
ونىڭ ايتۋىنشا، قىتاي سەيسميكالىق مونيتورينگكە كەدەرگى جاساۋ ارقىلى بۇل سىناقتاردى جاسىرۋعا تىرىسقان. سول سىناقتاردىڭ ءبىرى 2020 جىلعى 22 ماۋسىمدا بولعان.
قىتايدىڭ قارۋسىزدانۋ جونىندەگى ەلشىسى شەن تسزيان بۇل ايىپتاۋلارعا تىكەلەي جاۋاپ بەرمەي، قىتايدىڭ يادرولىق قارۋ ماسەلەسىندە بايىپتى ءارى جاۋاپكەرشىلىكپەن ارەكەت ەتەتىنىن اتاپ ءوتتى جانە اقش-تى قارۋلانۋ جارىسىن ۋشىقتىرىپ وتىر دەپ ايىپتادى.
يادرولىق سىناقتارعا تولىق تىيىم سالۋ تۋرالى شارت ۇيىمىنىڭ اتقارۋشى حاتشىسى روبەرت فلويد ۇيىمنىڭ مونيتورينگ جۇيەسى قىتايدىڭ بولجامدى سىناقتارى كەزىندە ەشقانداي كۇماندى ارەكەتتەردى انىقتاماعانىن مالىمدەدى.
"رەسەي اسپانىن بەلگىسىز اسكەري ۇشاقتار تورىدى" - شۇعىل تۇردە سانكت-پەتەربوردىڭ اۋە كەڭىستىگى جابىلدى
