فوتو: "ديدار" گازەتى
قازاقستان اقش گەولوگيالىق قىزمەتى (USGS) جاساعان تىزىمگە ەنگىزىلگەن 60 ماڭىزدى مينەرالدىڭ 20 ءتۇرى بويىنشا جەتكىزىلىمدەردى قامتاماسىز ەتۋگە قابىلەتتى. Report اگەنتتىگىنىڭ قازاقستان سىرتقى ىستەر مينيسترلىگىنە سىلتەمە جاساپ حابارلاۋىنشا، بۇل تۋرالى قازاقستاننىڭ سىرتقى ىستەر ءمينيسترى ەرمەك كوشەرباەۆ ۆاشينگتوندا اقش مەملەكەتتىك حاتشىسى ماركو رۋبيونىڭ شاقىرۋىمەن وتكەن ماڭىزدى مينەرالدار جونىندەگى العاشقى مينيسترلىك كونفەرەنتسيادا مالىمدەدى، دەپ حابارلايدى “ادىرنا”.
ەرمەك كوشەرباەۆ ارىپتەستەرىنە قازاقستاننىڭ ماڭىزدى مينەرالدار سالاسىنداعى الەۋەتى تۋرالى اقپارات بەرىپ، ەلدىڭ سەنىمدى ءارى تۇراقتى جاھاندىق جەتكىزۋ تىزبەكتەرىن قالىپتاستىرۋعا پراكتيكالىق ۇلەس قوسۋعا دايىن ەكەنىن راستادى. ونىڭ ايتۋىنشا، رەسپۋبليكادا مينەرالدىق شيكىزاتتىڭ ەلەۋلى قورلارى، دامىعان قايتا وڭدەۋ ونەركاسىبى، زاماناۋي ينفراقۇرىلىم، سونداي-اق تۇراقتى ساياسي جۇيە مەن بولجامدى رەتتەۋشى ورتا بار.
سونداي-اق، قازاقستان مەن اقش اراسىنداعى ماڭىزدى مينەرالدار سالاسىنداعى ىنتىماقتاستىق تۋرالى مەموراندۋمدى ىسكە اسىرۋعا ەرەكشە نازار اۋدارىلدى. بۇل قۇجات قازاقستان پرەزيدەنتىنىڭ 2025 جىلعى قاراشادا ۆاشينگتونعا جاساعان ساپارىنىڭ قورىتىندىسى بويىنشا قول قويىلعان. اتالعان مەموراندۋم ورتالىق ازياداعى وسى باعىتتاعى العاشقى كەلىسىم جانە قازاقستاندا قايتا وڭدەۋ قۋاتتارىن دامىتۋ، تەحنولوگيالار ترانسفەرى، سونداي-اق قازاقستاندىق ونىمدەردىڭ اقش نارىعىنا قولجەتىمدىلىگىن كەڭەيتۋدى كوزدەيدى.
كونفەرەنتسياعا G7 ەلدەرى مەن Pax Silica باستاماسىنا قاتىسۋشى مەملەكەتتەردىڭ سىرتقى ساياسات ۆەدومستۆولارى مەن سالالىق قۇرىلىمدارىنىڭ 30-دان استام باسشىسى، سونداي-اق جەتەكشى حالىقارالىق كومپانيالاردىڭ وكىلدەرى قاتىستى.
