تايۆان مەن قىتاي اراسىنداعى قارىم -قاتىناس سوڭعى 40 جىلدان بەرى رەتتەلمەي كەلەدى. ولار سوڭعى كۇندەرى بولعان وقيعالارعا، اتاپ ايتقاندا قىتايلىق ۇشاقتاردىڭ ارال بويىندا جاپپاي ۇشۋىنا الاڭدايدى، دەپ حابارلايدى “ادىرنا” ۇلتتىق پورتالى.
تايۆاندىق اسكەريلەردىڭ ايتۋىنشا، پەكين بىرنەشە جىلدان كەيىن ءساتتى اسكەري شابۋىل جاساۋ كۇشىنە يە بولادى.
تسيۋ گۋوجەن، تايۆان قورعانىس ءمينيسترى:
«ءبىز ەشقانداي كەلەڭسىزدىك تۋدىراتىن، ارانداتۋشىلىق ارەكەتتەردى ۇيىمداستىرعىمىز كەلمەيدى. ەگەر ءبىز ولاردى رەنجىتەتىن بولساق، ولار، ارينە، بىزگە كەرى جاۋاپ بەرۋ ءۇشىن بارلىق مۇمكىندىكتەرىن پايدالانادى. 2025 جىلعا قاراي ولار مىقتى اسكەر كۇشىن جاساقتايتىن بولادى».
امەريكا باسشىلىعى جاعدايدى رەتتەۋگە تىرىسىپ ءجۇر. دجو بايدەن پەكينمەن جاعدايدى تاعى دا تالقىلاۋعا ۋادە بەردى. ال شۆەيتساريادا امەريكا مەن قىتايدىڭ قاۋىپسىزدىك كەڭەسشىلەرىنىڭ كەزدەسۋى جوسپارلانعان.
دجو بايدەن، امەريكا قۇراما شتاتتارىنىڭ پرەزيدەنتى:
«مەن سي تسزينپينمەن تايۆان تۋرالى سويلەستىم. ءبىز كەلىسىمدەرگە قۇرمەتپەن قاراۋ كەرەك دەپ كەلىستىك. اشىق تۇردە ايتىلدى. مەنىڭشە، كەلىسىمنەن اتتاپ وتەتىن دۇنيەلەردى ىسكە اسىرماۋ قاجەت».
ەكىجاقتى ىنتىماقتاستىق ماسەلەلەرىن تالقىلاۋ ءۇشىن تايۆانعا فرانتسۋز سەناتورلارىنىڭ دەلەگاتسياسى كەلدى. بۇل قادام دا پەكيننىڭ نارازىلىعىن تۋدىرۋى مۇمكىن.
“ادىرنا” ۇلتتىق پورتالى
