Женевада өткен жаһандық қарусыздану конференциясында АҚШ Мемлекеттік хатшысының қару-жарақты бақылау және халықаралық қауіпсіздік жөніндегі орынбасары Томас Динанно Қытайды 2020 жылы жасырын ядролық сынақтар өткізді деп айыптап, Қытайды да қамтитын стратегиялық қару-жарақты бақылау жөніндегі кең ауқымды келісім жасауға шақырды. Бұл туралы Reuters агенттігі жазды, деп хабарлайды "Адырна".
«Мен АҚШ үкіметінің Қытайдың ядролық жарылыс сынақтарын өткізгенін білетінін мәлімдей аламын», — деді Динанно.
Оның айтуынша, Қытай сейсмикалық мониторингке кедергі жасау арқылы бұл сынақтарды жасыруға тырысқан. Сол сынақтардың бірі 2020 жылғы 22 маусымда болған.
Қытайдың қарусыздану жөніндегі елшісі Шэнь Цзянь бұл айыптауларға тікелей жауап бермей, Қытайдың ядролық қару мәселесінде байыпты әрі жауапкершілікпен әрекет ететінін атап өтті және АҚШ-ты қарулану жарысын ушықтырып отыр деп айыптады.
Ядролық сынақтарға толық тыйым салу туралы шарт ұйымының атқарушы хатшысы Роберт Флойд ұйымның мониторинг жүйесі Қытайдың болжамды сынақтары кезінде ешқандай күмәнді әрекеттерді анықтамағанын мәлімдеді.
