الماتىدا 3 ملرد تەڭگەگە سالىنعان مەكتەپ قاق ايىرىلۋى مۇمكىن. عيماراتتىڭ قابىرعالارى قاقىراپ، ىرگەتاسى شوگە باستاعان، دەپ حابارلايدى “ادىرنا” ۇلتتىق پورتالى “Qazaqstan” ۇلتتىق ارناسىنا سىلتەپ.
الاڭداۋلى اتا-انالاردىڭ كەيبىرى بالالارىمىزدى ساباققا جىبەرمەيمىز دەپ بەكىنىپ وتىر.
«مەن تالايدى كوردىم بىراق، مىناداي قۇرىلىس نورمالارىندا وسىنداي ەكىگە ءبولىپ، بىلاي قاڭىلتىرمەن جاۋىپ قويدى دەگەندى ءبىرىنشى رەت كوردىم. قۇرىلىسشىلاردان سۇراساق، مۇمكىن ەمەس دەپ تاڭ قالادى. قالاي تولىق بەتوننان قۇيىلعان عيمارات وسىلاي ەكىگە ءبولىنىپ تۇرادى؟!»، - دەيدى قوعامدىق بىرلەستىك وكىلى بولات ءابىلجانوۆ.
سالدارىنان عيماراتتىڭ الدىڭعى بولىگىنىڭ ىرگەتاسى شوگە باستاعان. ونى مىنا جارىقتاردان انىق اڭعارۋعا بولادى. شەتەلدە ءىسساپاردا ءجۇرمىن دەگەن مەكتەپ ديرەكتورى پروبلەمالاردى تەلەفونمەن جەتكىزدى.
«قۇرىلىس ساپاسىز جۇرگىزىلگەندىكتەن جاڭبىر جاۋعان كەزدە توبەسىنەن سۋ اعادى. قابىرعالارى جارىلا باستاعان، دالىزدەگى كافەلدەرى كوتەرىلىپ جاتىر. جوبا بويىنشا ەڭ قىمبات ەسىكتەر سالىنۋى كەرەك بولسا، 12 مىڭدىق قاعاز ەسىكتەر سالىنعان»، - دەيدى №202 مەكتەپ-گيمنازياسىنىڭ ديرەكتورى بولات جانايحان.
سىنىپتارداعى ەدەن دە ويىلىپ، ىشىنە ءتۇسىپ جاتىر. نىسان قۇرىلىسىنا تاپسىرىس بەرگەن جانە ونى قابىلداعان الماتى قالالىق قۇرىلىس باسقارماسىنا حابارلاستىق. ولار تەكسەرىس جۇرگىزۋگە ۋادە ەتتى.
«202 مەكتەبىمىز 10 بولەك بلوك دەپ اتالادى. سول بلوكتاردىڭ قۇرالعان جەرى انتيسەيسميكالىق تىگىس بار. ول بلوكتاردى ءوزارا قوسادى. سەيسميكالىق جاعدايدا مەكتەپ قابىرعالارىنىڭ تولقۋىن دۇرىستاۋ ءۇشىن بەرىلگەن. مەردىگەر مەكەمە، تەحنيكالىق باعدارلاۋ ماماندارى بار. تاعى دا جۇمىستار جۇرگىزىلەدى. شيكىلىكتەر بولسا، جوندەۋ جۇمىستارىن جاساپ بەرەمىز»، - دەدى قالالىق قۇرىلىس باسقارماسى باسشىسىنىڭ ورىنباسارى ولجاس تاجىباەۆ.
باسقارما باسشىلىعى عيماراتتىڭ اپاتتى جاعدايدا ەمەستىگىن العا تارتىپ، كەم-كەتىگى جىل سوڭىنا دەيىن تۇزەتىلەدى دەپ سەندىردى. 1200 بالاعا شاقتالعان ءبىلىم وشاعىندا قازىر 2000-نان استام وقۋشى وقىپ جاتىر.
